Almaty alma ósirýge qolaıly meken ǵana emes, dámi tatqan jannyń tańdaıynda qalatyn tátti almalardyń otany. Kóptegen zertteýlerge den qoısaq, alma jemisi Alataý baýraıyndaǵy alyp shahardyń tereń tarıhymen astasyp, sabaqtasyp jatqanyn baıqaımyz. Qalanyń kóne mádenıetinen habar beretin almaǵa qatysty derekterdi jiti zerttep, urpaqqa úlgi etýdiń mańyzy zor. Osy rette Almatyda tuńǵysh ret alma mýzeıi ashylǵanyn súıinshilep aıta ketkenimiz jón.
Qala atymen attas «Almaty» qonaqúıinde oryn tepken aıadaı mýzeıden alma men Almatynyń tarıhynan syr shertetin tańǵajaıyp derekterdi kezdestirýge bolady. Almaǵa qatysy bar ańyzdar men ertegiler, almanyń álemge qalaı taraǵany týraly áńgimeler, baqshashylyq jáne almanyń tasasyndaǵy tylsym mánderge boılatatyn tyń aqparattardyń barlyǵy osynda toptastyrylǵan. Jobaǵa muryndyq bolǵan «Almaly jumaq» qoǵamdyq qorynyń atqarýshy dırektory Ajar Jandosovanyń sózinshe, mýzeıdiń maqsaty – qazaqstandyqtar men sheteldikterge elimizdiń almanyń otany ekenin jáne bul jemistiń Almaty men álem úshin qandaı mańyzdy ekenin pash etý.
– Biz kóp materıal jınaqtadyq. Olardyń arasynda otandyq jáne sheteldik avtorlardyń alma týraly kitaptary, Qazaqstan – almanyń otany ekenin dáleldeıtin fransýz jáne nemister túsirgen derekti fılmder bar. Biz almaly ólkemiz. О́kinishke oraı, qolda bardy baǵalamaımyz. Eki ret alma baǵyn joǵalttyq. Áý basta qala baýraıyndaǵy alma ormandarynan aıyryldyq. Toqsanynshy jyldary qalany ulǵaıtý saldarynan qanshama alma aǵashy joıyldy. Elimizdegi alma kásibin jandandyrý úshin bul taqyrypty keńinen qozǵaımyz. Alma – bizdiń aıryqsha qundylyǵymyz.Mundaǵy ekspozısııalar ár 2-3 aı saıyn ózgertilip, tolyǵyp otyrady. Keıin mýltımedııalyq turaqty ekspozısııa paıda bolmaq. Arý qalamyzǵa ejelgi alma mádenıetin qaıtarǵymyz keledi, – deıdi Ajar Jandosova.
Uıymdastyrýshylardyń aıtýynsha mýzeı qabyrǵasynda túrli taqyryptardy qamtyǵan óner kórmeleri úzdiksiz ótkizilip turmaq. Almanyń arǵy otanyna balanatyn alyp megapolıstegi shaǵyn mýzeı qala qonaqtaryn shahar tarıhynyń tylsymyna boılatatyn birden-bir mádenı orynǵa aınalsa degen tilegimiz bar.
Arman OKTIаBR,
«Egemen qazaqstan»
ALMATY