Memleket basshysy daryndy balalarǵa arnalǵan ortalyqtyń jumysymen tanysty. Bul bilim mekemesiniń maqsaty – balalardyń zııatkerlik jáne tulǵalyq áleýetin damytý úshin qolaıly jaǵdaı jasaý, dep habarlaıdy Aqordanyń baspasóz qyzmeti.
Ortalyqtyń tárbıelenýshileri Qazaqstan Prezıdentine oqý aýdıtorııalary men laboratorııalyq kabınetterdi kórsetti.
Nursultan Nazarbaev jas jetkinshekterge «Bolashaq» stıpendııasy, Nazarbaev Ýnıversıteti, Nazarbaev Zııatkerlik mektepteri jáne olardyń jalpy el ekonomıkasyna tıgizip otyrǵan paıdasy jóninde áńgimelep berdi.
– Oblys jastary munaı-gaz salasy boıynsha bilim alýǵa tyrysady. Búginde munaı baǵasy qalypty, biraq birneshe jyldan keıin onyń quny tómendep, munaı óndirý azaıýy múmkin. Sondyqtan, bolashaqta suranysqa ıe bolatyn bilimdi tańdaý qajet, – dedi Memleket basshysy.
Qazaqstan Prezıdenti jurtshylyq ókilderimen áńgimelesý barysynda Aqtóbe oblysynyń elimizdegi tez órkendep kele jatqan óńirlerdiń biri ekenin atap ótip, 20 jyl ishinde Aqtóbe qalasynyń turǵyndary eki ese kóbeıgenin jáne qazirgi ýaqytta jarty mıllıonnan asqanyn aıtty.
– Aqtóbe baı tabıǵı resýrstarynyń, damyǵan óndirisi men ken óndirý salasynyń arqasynda Batys Qazaqstannyń ortalyǵyna aınaldy, – dedi Nursultan Nazarbaev.
Oblystyń áleýmettik-ekonomıkalyq damý qarqynyna oń baǵa bergen Memleket basshysy Qazaqstan halqyna arnalǵan jańa joldaýdaǵy jáne óńirlik deńgeıde sheshilýge tıis birqatar máseleni atap ótti.
– 2019 jyldan bastap eń tómengi jalaqy 1,5 ese ósetin bolady. Bul 40 myń aqtóbeliktiń ál-aýqatyna oń yqpal etedi. Olardyń jartysy – bıýdjet salasynyń qyzmetkerleri. Iri kásiporyndar osy bastamany qoldaıdy dep senemin, – dedi Qazaqstan Prezıdenti.
Nursultan Nazarbaev kólik ınfraqurylymyn damytý jáne jergilikti mańyzy bar joldardyń sapasyn jaqsartý máselelerine arnaıy toqtaldy.
– Oblystyń geografııalyq jaǵdaıyn eskere otyryp, Eýrazııa ekonomıkalyq odaǵyna múshe eldermen saýda-sattyq jasaýdyń tranzıttik múmkindikterin keńeıtý qajet, – dedi Memleket basshysy.
Qazaqstan Prezıdenti sapar qorytyndysy boıynsha jýrnalıster aldynda sóılegen sózinde óńir basshylyǵynyń negizgi áleýmettik-ekonomıkalyq kórsetkishterge qol jetkizý jáne memlekettik baǵdarlamalardy júzege asyrý jónindegi jumystaryna joǵary baǵa berdi.
– Oblys ekonomıkasy ósip, joldar, mektepter salynyp, qala ınfraqurylymy damýda. Aqtóbelikterdiń ál-aýqaty jaqsaryp keledi. Jergilikti atqarýshy organdar halyqtyń turmys sapasyn arttyrýǵa jáne «Bes áleýmettik bastama» men «Qazaqstandyqtardyń ál-aýqatynyń ósýi: tabys pen turmys sapasyn arttyrý» atty joldaýdy odan ári iske asyrýǵa kúsh jumyldyrýy kerek, – dedi Nursultan Nazarbaev.