Astanada keshe «Qazposhtanyń» uıymdastyrýymen dástúrli mereke – «Baspasózge jazylýshylar kúni» atap ótildi.
Elordada ótken «Baspasózge jazylýshylar kúni» merekelik sharasyna qatysqan «Egemen Qazaqstan» gazeti bıyl da jazdyryp alýshylarǵa óz tartý-taralǵysyn ala baryp, belsendi oqyrmandarymyzǵa «Egemen Qazaqstan» kitaphanasy» serııasymen shyqqan kitaptaryn syılady. Sondaı-aq jyrdan shashý shashyp, jınalǵan kópshilik qaýymǵa ǵasyrmen úndesken bas basylymnyń aq tilegin arnady.
«Jazylýshylar kúnin biz 1993 jyldan bastap dástúrli túrde atap ótemiz. Bıyl «Qazposhta» 25-ke tolyp otyr. Búgingi sharanyń erekshe sıpatta ótýi osymen de baılanysty» - dedi saltanatty jıynda sóz alǵan «Qazposhtanyń» Astanadaǵy fılıaly dırektorynyń orynbasary Ásel Syzdyqova.
Merekelik sharaǵa 11 gazet-jýrnal, atap aıtqanda, «Egemen Qazaqstanmen» birge «Kazahstanskaıa pravda», «Astana aqshamy», «Sport», «National Geografic», «Qazaqstan áıelderi» jáne basqa da basylymdar qatysty. Shara barysynda redaksııa ókilderi «Qazposhtany» shırek ǵasyrlyq toıymen quttyqtap, gazet-jýrnaldardy oqyrmanǵa jetkizýde mańyzdy ról atqaratyn mekeme qyzmetkerleriniń jumysyna tabys tiledi.
Qarlyǵash QURAMYS,
«Egemen Qazaqstan»