Jaqynda Zaısan aýdanynda ótken ǵylymı konferensııa kezinde qazaq jylqysynyń tarıhyn indete zerttep júrgen ǵalym, Almatydaǵy Shoqan Ýálıhanov atyndaǵy tarıh jáne etnologııa ınstıtýtynyń professory Ahmet Toqtabaı osyndaı aqparatty súıinshileı jetkizdi. Etnograf bıyl jazda Mońǵolııaǵa ekspedısııamen barǵanda sondaǵy áriptesterinen Abylaı hannyń Jońǵar qońtaıshysy Galdan Serenniń tutqynyna túsken shaqtaǵy bolǵan jerin estip, bilgen eken.
«Bul jer Baıan О́lgeıden 300 shaqyrym qashyqtyqta. Biraq taba almaı qaıttyq. Sebebi, muny biletin, kórsetetin mońǵoldyń shaly Ulan Batyrǵa ketip qalypty. Degenmen alǵashqy qadam jasaldy. Keleshekte 1741 jyly Abylaı han tutqynda bolǵan jurtty tabamyz ǵoı dep oılaımyn», - deıdi etnograf.
Ahmet Toqtabaı osy saparynda qazaqtyń dańqty batyrlaryna qatysty derekterdi de jınap qaıtypty. Mońǵolııadaǵy jońǵardan qalǵan zaǵshyn, dúrbit, torǵaýyt taıpalarynyń aqsaqaldarymen sóıleskende olardyń arasynda Qabanbaı batyr esimi kóbirek aıtylatynyna, qolbasshynyń meıirimdiligi, qalmaqtyń tutqyndaryna bostandyq bergeni, ásirese tutqynǵa túsken adamdardy jábirlemegeni jıi tilge tıek etiletinin baıqapty. Qaban degen sóz mońǵol tilinde bas qolbasshy degen uǵymdy bildiredi eken. «Jalpy, tarıhı qaıratkerge ekinshi ataýdy basqa halyq beredi. Osyndaı faktiler mańyzdy. Ejelgi jaýlarymyzdyń bergen baǵalaryn da esepke alýymyz kerek», - deıdi tarıhshy.
Azamat QASYM,
«Egemen Qazaqstan»
Shyǵys Qazaqstan oblysy