Bul elimizdegi Memlekettik qyzmet jáne sybaılas jeımqorlyqqa qarsy is-qımyl agenttiginiń departamentteri qurǵan úshinshi ofıs bolyp sanalady. Oǵan kásipkerler, qarapaıym adamdar memlekettik organdar jumysyna qatysty aryz-shaǵymdarymen keledi. Sonymen qatar ofıs qyzmetkerleri sybaılas jemqorlyqtyń aldyn alýǵa, oǵan qarsy kúresti nasıhattaıtyn profılaktıkalyq sharalar ótkizedi. Munda qyzmet isteıtin mamandar irikteldi, jumystyń ádistemelik bazasy jasalyp, bilim, densaýlyq saqtaý, quqyq qorǵaý salalary jumysy boıynsha sarapshylar toby qurylady. Keńsede kún saıyn negizgi departamentter men vedomstvolardyń bes ókili azamattardy qabylaıdy.
«Jańa jyldan keıin qoǵamdyq baqylaýdyń ınteraktıvtik kartasyn jasaıtyn bolamyz. Kez kelgen azamat saıtqa, portalǵa kirip, qarjynyń qaıda, qandaı maqsatpen jumsalyp jatqandyǵyn bile alatyn bolady. Bul ofıs memleket pen azamattyq qoǵam arasyndaǵy kópir mindetin atqarady. Kez kelgen turǵyn bizdiń ofıske kelip, memlekettik qyzmetke, men aıtqan salalar jumysyna qatysty shaǵymyn, tilegin, usynysyn aıta alady. Turǵyndar shaǵymy men eskertýleri mindetti túrde qaralatyn bolady» deıdi ofıs jetekshisi Evgenıı Bedych.
«Kostanai – Adaldýq Alaný» jobalyq ofısin Qostanaı oblysyna is-saparmen kelgen QR Memlekettik qyzmet jáne sybaılyq jemqorlyqqa qarsy is-qımyl agenttiginiń tóraǵasy Alık Shpekbaev pen oblys ákimi Arhımed Muhambetov kelip kórdi.
«Jumys maqsaty – turmystyq sybaılas jemqorlyqtyń tamyryna balta shabý kerek. Elbasy 2020 jylǵa deıin salany sıfrlandyrý kerektigin aıtty. Qazir bul jumys qarqyndy júrip jatyr. Móldirlikti qamtamasyz etetin barlyq jumys sıfrlandyrylady, soǵan qaramastan qalǵan múmkindikterdi de barynsha paıdalaný kerek. Osylaı turmystaǵy sybaılas jemqorlyqpen kúresý kerek, tipti,ony jeńýimiz kerek» dedi Alık Shpekbaev.
Mundaı ofıster Elbasynyń bastamasy boıynsha barlyq oblys ortalyqtarynda qurylatyn bolady.
Názıra Járimbet,
«Egemen Qazaqstan»
Qostanaı