Kelesi jyldyń 11 qańtarynda AQSh-tyń Kalıfornııa shtatynyń Santa-Inese qalasynda ótetin boks keshinde Qazaqstannyń qos óreni – Madııar Áshkeev pen Meıirim Nursultanov óner kórsetedi.
Osy jarystaǵy jerlestermizdiń qarsylastary belgili boldy. Birinshi orta salmaqtaǵy Madııar Áshkeev Lýıs Ernandespen qolǵap túıistiredi. 32 jastaǵy Pýerto-Rıkanyń ókili osy kúnge deıin 22 kezdesý ótkizip, 16 ret jeńiske jetti. 9 qarsylasyn nokaýtpen utty. Al qandasymyz 10 básekeniń barlyǵynda ústemdik tanytty. 6 aıqasty merziminen buryn aıaqtady.
Meıirim Nursultanov Ernesto Amazýmen sheberlik baıqasady. 25 jastaǵy Gananyń ókili de talaı dúbirli dodalarda ysylǵan saqa sportshy. Ol 28 ret rıngke kóterilip, 24 aıqasty óz paıdasyna sheshti. Al qazaq boksshysy 9 jekpe-jeginde de jeńis toıyn toılap, 7 qarsylasyn esinen tandyrdy.
Ǵalym SÚLEIMEN,
«Egemen Qazaqstan»