17-21 jeltoqsan aralyǵynda Qaraǵandyda bokstan belgili qoǵam qaıratkeri, elimizge eńbek sińirgen jattyqtyrýshy Ǵalym Jarylǵapovty eske túsirýge arnalǵan XXXV halyqaralyq týrnırdiń jalaýy jelbireıdi.
Jyl saıyn osy týrnırge sport juldyzdar kelip, jergilikti jankúıerlerdi bir jelpindirip ketedi. О́zgelerdi aıtpaǵanda, AQSh-tyń dańqty boksshysy, kásipqoı rıngtiń kókjaly Roı Djonstyń ózi kómirli ólkege bir emes, birneshe márte taban tiregeni esimizde. Bıylǵy jarysty tamashalaý úshin germanııalyq boksshy Krıstına Hammer jáne reseılik kınorejıssıor jáne ssenarıst Oleg Stepchenko men akter Igor Jıjıkın Qaraǵandyǵa at basyn burmaq.
Esimderi joǵaryda atalǵan azamattardyń alǵashqy ekeýi bizge bóten emes. Máselen, Krıstına Hammer 1990 jyly Qaraǵandy oblysynyń Novopodolınsk kentinde dúnıege keldi. Balaýsa kezinde ata-anasymen birge Germanııaǵa qonys aýdardy. Dortmýndta júrip, bokstyń qyr-syryna qanyqty. 2009 jyly kásipqoı rıngke qadam basty. Sol ýaqyt aralyǵynda 24 kezdesý ótkizip, birde-bireýinde jeńilgen joq. Bul kúnderi Krıstına birqatar beldi nuqsalar boıynsha álem chempıony atanyp otyr.
Oleg Stepchenko 1965 jyly Qaraǵandy qalasynda týdy. V.I.Sýrıkov atyndaǵy Máskeý memlekettik akademııalyq kórkemóner ınstıtýtyn aıaqtap, eńbek jolyn sol jaqty bastady. Birqatar jaqsy fılmder túsirip, myqty ssenarııler jazdy. Al Máskeýdiń týmasy Igor Jıjıkın bolsa, Gollıvýd pen Reseı kınosynda tanylǵan óte sheber akter.
Bıyl 35 márte uıymdastyrylǵaly otyrǵan Ǵalym Jarylǵapovty eske túsirýge arnalǵan týrnırde bul joly Qazaqstannan bólek, Reseı, Mońǵolııa, Qytaı, Taıland, О́zbekstan jáne Qyrǵyzstannyń beldi bylǵary qolǵap sheberleri baq synaıdy.
Ǵalym SÚLEIMEN,
«Egemen Qazaqstan»