Atyraýda balyqtardyń qyrylýy boıynsha Jaıyq ózenin zertteý jumystary jalǵasýda, dep habarlaıdy Atyraý oblysynyń О́ńirlik kommýnıkasııalar qyzmeti.
Jeltoqsan aıynyń basynan bastap Jaıyq ózeninde balyqtyń qyrylý faktisi tirkelgen bolatyn. 10 jeltoqsan kúni oblystyq ákimdikte vedomstvoaralyq komıssııanyń jıyny ótti.
Búgingi tańda 110 birlik ólgen balyq tirkeldi, qalǵan balyqtardyń jaǵdaıy nashar. Qoǵamdyq densaýlyq saqtaý departamenti ókilderiniń aıtýynsha, zerthanalyq zertteýler júrgizildi, sý quramy taza, adamdardyń ómirine qaýip joq.
- Qazir jaǵdaı tolyqtaı baqylaýda. Tótenshe jaǵdaı tek Atyraý qalasynda, aýdandarda mundaı aqparat tirkelmedi. Alynǵan synamalar boıynsha tekseris jumystary júrgizildi. Atalǵan jaǵdaı turǵyndardyń densaýlyǵyna zııanyn tıgizbeıdi,- deıdi Atyraý oblystyq Qoǵamdyq densaýlyq saqtaý departamentiniń basshysy Temirbek Mýsaǵalıev.
Komıssııa otyrysynda Nurlan Noǵaev atqarýshy organdarǵa birqatar tapsyrmalar berdi.
- Másele shuǵyl túrde sheshimin tabý kerek. Qajet dep tapqan múmkindikterdiń barlyǵyn qoldanyp, balyqtyń naqty neden ólgenin anyqtańyzdar. Ýákiletti organdardyń barlyq kúshi balyqtyń ólýi máselesin aldyn-alýǵa jumyldyrylýy qajet,- dep tapsyrdy oblys ákimi.
Aıta keteıik, Atyraý oblystyq orman sharýashylyǵy jáne janýarlardy qorǵaý ınspeksııasymen vedomstvoaralyq komıssııa quryldy.Komıssııa quramyna Atyraý oblystyq balyq sharýshylyǵy basqarmasy, mamandandyrylǵan tabıǵat qorǵaý prokýratýrasy, ekologııa departamenti, Qazaq balyq sharýashylyǵy ǵylymı zertteý ınstıtýty, veterenarııalyq baqylaý jáne qadaǵalaý aýmaqtyq ınspeksııasy, tótenshe jaǵdaılar departamenti men Atyraý qalalyq qoǵamdyq densaýlyq saqtaý basqarmasynyń mamandary endi. Zertteý barysynda xımııalyq zertteý sý synamalary alyndy.