Qoǵamdy adaldyqqa úıretý, jastardy jaqsylyqqa baýlý maqsatynda Taraz Memlekettik pedagogıkalyq ýnıversıtetiniń ǵımaratynan «Adaldyq dúkeni» ashyldy. Atalǵan dúkenniń ózge saýda núktelerinen bir ereksheligi – munda satýshy joq. Bilim ordasynda ornalasqan erekshe dúkenniń jumysymen Jambyl óńirine jumys sapary barysynda Qazaqstan Respýblıkasy qyzmet isteri jáne sybaılas jemqorlyqqa qarsy is-qımyl agenttigi tóraǵasynyń orynbasary Aıgúl Shaıymova men elimizdiń Bilim jáne ǵylym mınıstriniń orynbasary Bıbigúl Asylova arnaıy kelip tanysty.
О́zine-ózi qyzmet kórsetý júıesine negizdelgen erekshe dúkennen oqytýshylar men stýdentter ózderine qajet zattardy tańdap alyp, aqshany sondaǵy arnaıy qorapqa salady eken. Sondyqtan da satýshysy joq bul dúken tek adaldyq qaǵıdalary boıynsha jumys isteıdi. Al, atalǵan ýnıversıtettiń stýdenti Ersultan Núsipjanovtyń aıtýynsha, dúkennen árbir azamat ózi tańdaǵan zattardy alýmen qatar, kitap oqýǵa da múmkindigi bar eken. «Mundaǵy maqsat – qoǵamdy adaldyqqa úıretý. Ásirese jastar úshin bul óte jaqsy bastama boldy dep oılaımyn», deıdi ol.
Satýshysy joq erekshe dúken jastardy adaldyqqa baýlıtyny sózsiz. Dúken ishinde jastardy jaqsylyqqa úndeıtin «Adaldyq alańy», «Taýardy tańda, aqshasyn tóle jáne qaıtarymyn al. Biz seniń áleýmettik jaýapkershiligińe senimdimiz» dep jazylǵan.
Hamıt Esaman,
«Egemen Qazaqstan»
Jambyl oblysy