Búgin Premer-Mınıstr Baqytjan Saǵyntaevtyń tóraǵalyǵymen ótken Úkimettiń otyrysynda energetıka mınıstri Q. Bozymbaev 2018 jyldyń 11 aıyndaǵy otyn-energetıka salasynyń damýy týraly baıandady, dep habarlaıdy primeminister.kz.
Energetıka mınıstrliginiń málimetinshe, 2018 jyldyń 11 aıynda otyn-energetıka salasynyń negizgi kórsetkishteri oń ósim dınamıkasyn kórsetip otyr.
82,4 mln tonna munaı jáne kondensat óndirildi, bul 2017 jyldyń sáıkes kezeńimen salystyrǵanda 4,9%-ǵa joǵary. Q. Bozymbaev atap ótkendeı, onyń ishinde, úsh iri joba boıynsha munaı óndirý kólemi 49 mln tonnany qurady: Qashaǵanda — 12 mln tonna, Teńizde — 25,9 mln tonna, Qarashyǵanaqta — 11,1 mln tonna munaı óndirildi. Munaı eksportynyń kólemi 66 mln tonnaǵa jetti, bul byltyrǵy sáıkes kezeńimen salystyrǵanda 3,8%-ǵa artyq.
«Munaı óńdeý kólemi shamamen 15 mln tonnany qurady, bul 2017 jyldyń sáıkes kezeńimen salystyrǵanda 8,6%-ǵa joǵary jáne osy jyldyń 11 aıynda jospardan 2,4%-ǵa artyq. Munaı ónimderi óndirisiniń kólemi (avıakerosın, dızeldi otyn, mazýt, benzın) 10,6 mln tonnany qurady, bul 2017 jyldyń osyndaı kezeńimen salystyrǵanda 9,3%-ǵa jáne bıylǵy 11 aıdyń josparynan 3,9%-ǵa artyq», — dep baıandady energetıka mınıstri Q. Bozymbaev.
Jalpy, mınıstrdiń aıtýynsha, munaı ónimderi naryǵyndaǵy jaǵdaı turaqty, janar-jaǵarmaı tapshylyǵy joq. 10 jeltoqsandaǵy jaǵdaı boıynsha, Aı-92 markaly benzınniń ortasha baǵasy: bir lıtri úshin 154,8 teńge, al maýsym aralyǵynda dızel otynynyń bir lıtri 193,2 teńgeni quraıdy. Elimizdegi munaı bazalarynda janar-jaǵar maıdyń qaldyq qorynyń kólemi ishki naryqtyń qajettiligin óteý úshin jetkilikti: Aı-92 benzıniniń qory – 267,5 myń tonna (30 kúnge) jáne dızel otyny – 143,2 myń tonna (11 kúnge) .
«Elimizdiń shekaralas aýmaqtarynda janar-jaǵarmaıdy tranzıttik tasymaldaýda joǵary tutyný faktileri oryn alýda. Bul kórshiles eldermen salystyrǵanda munaı ónimderi baǵalarynyń aıyrmashylyǵyna baılanysty bolyp otyr», — dedi Q.. Bozymbaev.
Osyǵan baılanysty, Qazaqstanda janarmaı baǵasynyń kóterilýine jol bermeý úshin, sondaı-aq dızel otyny tapshylyǵynyń qaýpin azaıtý maqsatynda Energetıka mınıstrligi Eýrazııalyq ekonomıkalyq odaqtyń normalaryna qaıshy kelmeıtin qoldanystaǵy zańnama negizinde, Qazaqstan Respýblıkasynyń shekarasynan tys jerlerge munaı ónimderin (dızel otyny) shyǵarýǵa ýaqytsha tyıym salý úshin sharalar ázirleýde.
Qazaqstanda Aı-92 markaly benzınniń bólshek saýda baǵasy bir lıtr úshin 154,8 teńge, Reseı Federasııasynda — 230,5 teńge, О́zbekstanda — 273 teńge, Qyrǵyzstanda — 234 teńgeni quraıdy. Qazaqstanda dızeldi otynnyń bir lıtri orta eseppen — 193,2 teńgeni, RF-te — 246,5 teńgeni, Qyrǵyzstanda — 250,8 teńge, al О́zbekstanda — 208 teńge quraıdy.
50,5 mlrd m3 gaz óndirildi, 2017 jyldyń qańtar–qarasha aılarymen salystyrǵanda 4,8%-ǵa artty, al 11 aıdyń josparynan 6,1% ósimdi kórsetti. Gaz eksportynyń kólemi 17,9 mlrd m3 qurady, bul 2017 j. sáıkes kezeńinen 14%-ǵa joǵary.
EM derekterine sáıkes, suıytylǵan munaı gazynyń óndirisi 2,8 mln tonnany qurady, bul 2017 jyldyń sáıkes kezeńinen 7,3%-ǵa artyq. Munaı bıtýmy óndirisi 809 myń tonna kóleminde, bul 2017 j. sáıkes kezeńiniń 147%-yn, al 2018 jyldyń josparyna sáıkes 108% quraıdy.
Elektr qýatyn óndirý kólemi 96,7 mlrd kVtsaǵ qurady, bul 2017 jyldyń sáıkes kezeńimen salystyrǵanda 4,8%-ǵa joǵary.
Ýran óndirý kólemi 19,6 myń tonna qurady (2018 j. jospary – 21,6 myń tonna, 11 aıǵa jospar – 19,4 myń tonna). Byltyrǵy jylmen salystyrǵanda 93% kórsetti. Al, 11 aıdyń josparynyń — 100,8%.
«Otyn-energetıka salasy qarqyndy damyp keledi. Negizgi kórsetkishterge qol jetkizý Mınıstrliktiń turaqty baqylaýy men monıtorıngine alynǵan», — dep túıindedi mınıstr Q. Bozymbaev.