Dana halqymyzda «batamen el kógerer, jańbyrmen jer kógerer» degen ataly sóz bar. Árıne, istegen isińe, jaǵymdy qylyǵyńa oraı aýzy ýáli úlkenderdiń batasyn alǵan bir ǵanıbet ekendigi daýsyz. Alaıda sol batany bere biletin adam kóp pe?..
Ilkiden jalǵasyp kele jatqan izetti dástúrdiń sabaqtastyǵyna sál selkeý túskenin de kórip júrmiz. Ásirese jıyn-toıda bata bergenniń jóni osy eken dep, uzyn-sonar áńgime aıtyp ketetinder aragidik bolsa da kezdesedi. Tipti mazmunsyz, maǵynasyz sóz sóılep, sońynda eski daǵdymen «alyp qoıaıyq» dep jańylysqandardy da kórgenbiz.
Elbasy Nursultan Nazarbaevtyń «Bolashaqqa baǵdar: rýhanı jańǵyrý» maqalasynyń baǵyttaryn iske asyrý maqsatynda oblystyq ardagerler keńesiniń uıymdastyrýymen tuńǵysh ret tartymdy shara ótti. Bul shara «Batamen el kógerer» dep atalady. Taǵylymdy sharanyń oıdaǵydaı ótýine atsalysqan oblystyq ardagerler keńesiniń tóraǵasy Ǵosman Tóleǵul óz oıyn bylaısha órbitedi.
– Bala kezimizde elimizdiń úlkenderi qolǵabys etken saıyn aq tilekterin aqtaryp, bata berýshi edi. Sol kúni isimiz ońǵa basqandaı qanattanyp júretinbiz. Sóz narqyn biletin nar tulǵalardyń áziz kókirekterindegi jyp-jyly sezim nury jan dúnıemizdi shýaqqa malyp, úmitimizdi ushtaı túsetin. Halqymyzdyń osy bir qasıetti dástúri qaıta jańǵyryp, mazmuny túrlenip jatsa, nur ústine nur emes pe?! – deıdi ol.
Baıqaýǵa el aǵalary qatysty. Jarym yrysqa balanǵan jaqsy sóz, ómirdiń ár sátine oraı beriletin aq batalardyń túri, úlgisi, mańyzy, mazmuny, áýezi men maqamy tarazy basyna tartyldy. Baıqaý sońynda batagóılerdiń biliktiligi sarapqa salynyp, jeńimpazdarǵa arnaıy syılyqtar tapsyryldy. Sandyqtaý aýdanynan kelgen aqsaqal Jaqsybaı Ahmetov bas júldege ıe bolsa, Birjan sal aýdanynyń el aǵasy Myrzabek Burmaǵanov birinshi orynǵa ıe boldy.
Baıqal BAIÁDIL,
«Egemen Qazaqstan»