Qazaqstan Irannyń ıadrolyq baǵdarlamasyna qatysty Jan-jaqty qamtylǵan birlesken is-qımyldar josparyn (JQBIJ) aımaqtaǵy ıadrolyq qaýipsizdikti qamtamasyz etýdiń túıindi qujaty retinde qarastyrady. Bul jóninde Qazaqstannyń BUU janyndaǵy Turaqty О́kili Qaırat Omarov BUU Qaýipsizdik Keńesiniń ashyq otyrysynda jarııa etti, dep habarlaıdy SIM baspasóz qyzmeti.
BUU Qaýipsizdik Keńesi 12 jeltoqsanda BUU Bas Hatshysynyń 2231 qararynyń oryndalýy týraly altynshy jartyjyldyq baıandamasyn qarastyrdy. Baıandamanyń negizgi mazmunymen Keńes múshelerin BUU Bas Hatshysynyń saıası máseleler jónindegi orynbasary Rozmarı DıKarlo tanystyrdy. Otyrysqa AQSh Memlekettik hatshysy Maıkl Pompeo qatysty.
«Qazaqstan Prezıdenti Nursultan Nazarbaevtyń BUU Qaýipsizdik Keńesine arnaǵan saıası joldaýynda atalǵandaı, Qazaqstan Iran ıadrolyq baǵdarlamasy tóńiregindegi ahýaldy retteý boıynsha birlesken is-qımyldar josparyna jáne onyń odan ári júzege asyrylýyna óz qoldaýyn jalǵastyryp keledi. Biz bul qujattyń aımaqtaǵy beıbitshilik pen turaqtylyqty saqtap qalýdaǵy mańyzdy rólin, sondaı-aq Irannyń túrli salalardaǵy yntymaqtastyǵynyń jańa keleshegi úshin mańyzy zor ekendigine senimdimiz», - dedi Q. Omarov.
BUU Bas hatshysynyń baıandamasynda: «JQBIJ- ıadrolyq qarýdy taratpaý salasyndaǵy mańyzdy jetistik, ári dıalog pen dıplomatııa tıimdiliginiń kórnekti dáleli» - delingen. Qazaqstan osy kelissózder úderisine 2013 jyly Almatyda eki syndarly kezdesýler uıymdastyrý arqyly tarıhı kelisimge qol jetkizýge óz úlesin qosqanyn maqtan tutady.
Qazaqstandyq delegasııa basshysy Kelisimniń iske asyrylýynan onyń barlyq taraptary paıdasyn kórýi tıis degen BUU Bas hatshysynyń úndeýin qoldap ótti. Sonymen qatar, Kelisim taraptarynyń óz ekonomıkalyq operatorlaryna Iranmen zańdy yntymaqtastyǵyn BUU Qaýipsizdik Keńesi qararynyń talaptary aıasynda júzege asyrý bostandyǵyn qamtamasyz etý umtylystaryna da pikirlestigin bildirdi.
Q. Omarov Qazaqstannyń geografııalyq jaǵdaıy men tranzıttik áleýetin eskere otyryp, aımaqtyń barlyq elderimen belsendi áriptestikti damytýdaǵy zańdy múddelerine nazar aýdardy. JQBIJ-niń oryndalýynyń arqasynda aımaqtaǵy saýda-ekonomıkalyq yntymaqtastyq pen damýdyń aıtarlyqtaı jandana túsýi atap ótildi.
«Qazaqstan Jan-jaqty qamtylǵan birlesken is-qımyldar jospary men 2231 qararynyń taratpaý rejımin nyǵaıtýǵa jáne aımaqtaǵy turaqtylyq pen beıbitshilikti qamtamasyz etýge odan ári úlesin qosa beredi degen úmitpen Qaýipsizdik Keńesindegi óz jumysyn aıaqtaý ústinde», - dedi QR Elshisi óz sózinde.