Qurlyqtyq hokkeı lıgasynda (QHL) baq synap jatqan elordanyń «Barys» komandasy syrt alańdaǵy kezdesýin jeńispen aıaqtady. Beıjiń qalasyna sapar shekken elorda komandasy jergilikti «Kýnlýn RS» klýbyn 1:4 esebimen tize búktirdi.
Kezdesýdi belsendi bastaǵan «Barys» hokkeıshileri birinshi kezeńniń 14-mınýtynda Mettıý Frettınniń arqasynda esep ashyp, 0:1 nátıjesimen esepte alǵa shyqty. Ekinshi kezeńniń 25-mınýtynda muzaıdyn ıelerinen Voıtek Volskıı esepti teńestirgen bolatyn. Degenmen «Barys» oıynshysy Anton Sagadeev 29-mınýtta qarsylas komanda qaqpasyna ekinshi shaıbany soqty. Aradan bir mınýt ótkende Nıkıta Mıhaılıs mergendigimen kózge túsip, komandasynyń úshinshi shaıbasyn saldy. Úshinshi kezeńniń aıaqtalar tusynda Vıktor Svedberg «Kýnlýn RS» komandasynyń bos qalǵan qaqpasyna esh qıyndyqsyz gol salyp, kezdesýdiń núktesin qoıdy.
Bul jeńisten soń elorda komandasy 52 upaımen QHL-diń týrnır kestesinde besinshi orynǵa myqtap jaıǵasty. «Barys» kelesi kezdesýin Astanadaǵy «Barys Arena» muzaıdynynda Cherepovestiń «Severstal» klýbyna qarsy ótkizedi.
Álı BITО́RE,
«Egemen Qazaqstan»