Qasym-Jomart Toqaevtyń tóraǵalyq etýimen Senat Bıýrosynyń 2018 jylǵy qorytyndy otyrysy boldy. Palatanyń 27 jeltoqsanda bolatyn kezekti otyrysynyń kún tártibi kelisildi, dep habarlaıdy Senattyń baspasóz qyzmeti.
Senatorlar Qazaqstan men Horvatııa arasyndaǵy Tabysqa salynatyn salyqtarǵa qatysty qosarlanǵan salyq salýdy boldyrmaý jáne salyq salýdan jaltarýǵa jol bermeý týraly úkimetaralyq kelisimdi jáne oǵan Hattamany; Qazaqstan men QHR arasyndaǵy Qazaqstanǵa tikeleı ınvestısııalar salýdy júzege asyratyn Qytaı-Qazaqstan óndiristik qýattarynyń yntymaqtastyǵy qory kirisiniń jekelegen túrlerin salyq salýdan bosatý týraly úkimetaralyq kelisimdi ratıfıkasııalaý týraly; Qazaqstan Respýblıkasynyń keıbir konstıtýsııalyq zańdaryna Qazaqstan Respýblıkasynyń ákimshilik-aýmaqtyq qurylysy máseleleri boıynsha ózgerister engizý týraly; elimizdiń keıbir zańnamalyq aktilerine ákimshilik-aýmaqtyq qurylys jáne kóleńkeli ekonomıkaǵa qarsy is-qımyl máseleleri boıynsha ózgerister men tolyqtyrýlar engizý týraly; zańnamalyq aktilerge menshik quqyǵyn qorǵaýdy kúsheıtý, tórelik, sot júktemesin ońtaılandyrý jáne qylmystyq zańnamany odan ári izgilendirý máseleleri boıynsha ózgerister men tolyqtyrýlar engizý týraly zań jobalaryn qaraıtyn boldy.
Bıýro músheleri sondaı-aq Senattyń 2019 jylǵa arnalǵan Negizgi is-sharalar josparyn bekitti jáne halyqaralyq parlamenttik uıymdardaǵy jáne shet memleketter parlamentterimen yntymaqtastyq toptaryndaǵy Senat depýtattarynyń quramyn jasaqtady. Parlament Senaty men Belarýs Respýblıkasy Ulttyq jınalysynyń Respýblıka keńesi arasyndaǵy Yntymaqtastyq jónindegi komıssııasy Innovasııa salasyndaǵy yntymaqtastyqty damytý jónindegi kishi komıssııany qurdy.
Q.Toqaev ótip bara jatqan jyldy qorytyndylaı kelip, Senat jyl ishinde josparly ári mazmundy jumystardy atqarǵanyn atap ótti. Elbasy usynǵan reformalardy júzege asyrýǵa baǵyttalǵan mańyzdy zań jobalary ýaqytyly qabyldady. Senat otyrystarynda 80 zań jobasy qaralyp, olardyń 72-si qabyldandy, al 8-i Májiliske qaıtaryldy.
Senat jyl ishinde ózekti taqyryptarǵa arnalǵan jetpiske jýyq mańyzdy sharalar ótkizdi, olardyń nátıjesinde atqarýshy organdarǵa naqty usynystar berildi. Senat Tóraǵasy sondaı-aq, Palata depýtattary atynan Úkimetke 100-den asa depýtattyq saýal joldanǵanyn aıta kelip: «Saýaldarǵa berilgen jaýaptardyń basym kópshiligine depýtattardyń kóńili tolmaı otyrǵanyna Úkimettiń nazaryn aýdarǵan bolatynbyz», - dedi. Aldaǵy jyly Elbasynyń tapsyrmalaryn oryndaýǵa baǵyttalǵan mańyzdy zań jobalarynyń toptamasy túsetini aıtyldy. «Biz jumysymyzdyń sapasyn odan ári jaqsartyp, otandyq zańnamany jetildire berýimiz qajet. Bul - bizdiń eń basty mindetimiz», - dedi Senat basshysy.