Biz qazirgi ýaqytqa deıin Jeltoqsan kóterilisiniń tragedııalyq jaǵyn ǵana aıtyp kelemiz. Qubylys deńgeıindegi kóterilistiń shynaıy mánin – patrıotızm men qaharmandyqtyń qaıtalanbas úlgisin kórsetken jastarymyz árqashan qurmet bıiginde turýy tıis.
Táýelsizdigimizdiń tarıhı qadamdary Jeltoqsanǵa demokratııalyq, halyqaralyq standart boıynsha jańasha, shynaıy saıası, quqyqtyq baǵa berýdi qajet etedi.
Qazaqstandaǵy Jeltoqsan kóterilisi jańa táýelsiz memleketterdiń qurylýyna ákelgen, sosıalıstik lagerdiń qulaýyna sebepshi bolǵan, halyqtardyń erkindikti ańsaý jolyndaǵy serpilis jasaýynyń negizin qalady. Kóterilis elimizdiń barlyq aımaqtaryndaǵy sııaqty, Aqmola men Kókshetaýda da boı kórsetti. Totalıtarlyq qoǵam sosıalıstik júıeniń saltanatyn barynsha qorǵap qalýǵa jantalasty, aıaýsyz basyp-janshý saıasatyn ustandy. Mysaly, 17-25 jeltoqsan aralyǵynda ǵana ishki ister bólimderine 83 stýdent, 1168 jumysshy, 49 qyzmetker, 164 ýchılıshe oqýshysy, 102 jumyssyz, 1214 komsomol, 54 partııa múshesi toǵytyldy. Qaırat Rysqulbekov, Erbol Sypataev sııaqty qaısar qaharmandar qyrshyn ketti.
Azattyq jolynda qurban bolǵan jastardyń atyn máńgilik este qaldyrý sharalary elimizde keńinen júrgizilýde jáne júrgizile beretini anyq. Osy oraıda sońǵy jyldary Kókshetaýda kóshe ataýlary elimizge eńbegi sińgen tulǵalardyń esimimen atala bastaǵanyn aıta otyryp, «jeltoqsanshylarǵa» da bet burý qajettigin eske salǵymyz keledi. Kókshetaýda áıgili «Molodaıa gvardııa» órenderi Oleg Koshevoı, Lıýbov Shevsova, Sergeı Tıýlenın, Ýlıana Gromova atyndaǵy kósheler bar. Olardyń barlyǵy Keńes Odaǵynyń Batyry ataǵyn alǵandar. Bulardyń tarıh qoınaýyndaǵy saıası qyzmeti aıaqtalǵan dep esepteımiz. Búginde óz «jeltoqsanshylarymyzdyń», aldymen Qaırat Rysqulbekov pen Erbol Sypataevtyń esimderin kóshelerimizge bersek, barshamyzdyń, ásirese jastardyń boıynda otansúıgishtik, maqtanysh sezimi alaýlap turatyny aıtpasa da túsinikti.
Baqbergen AMALBEK,
Qazaqstannyń qurmetti jýrnalısi
Kókshetaý