Bir kúnde Fedorov aýdanynda úsh birdeı shara, úsh birdeı qýanysh boldy. Aldymen aýdan ortalyǵynan qol sozym jerde táýligine 50 tonna maı syǵatyn qýatty zaýyt ashyldy. Osy aýdandaǵy «Qarjaý» sharýa qojalyǵy osydan birneshe jyl buryn maı zaýytyn ashyp, onda nemis tehnologııasy boıynsha sýyqtaı syǵylǵan, tazartylmaǵan kúnbaǵys maıyn shyǵaratyn.
Oblys naryǵynda «Lavra» degen atpen belgili maı sapasynyń joǵarylyǵymen dúken sórelerinde kóp jatpaıdy, tutynýshy ony izdep júrip alady. Endi «Prombaza-7» jaýapkershiligi shekteýli seriktestigi «Damý» kásipkerlikti damytý qory arqyly 1 mıllıard 700 myń teńge ınvestısııa salyp, tazartylǵan maı óndirýdi qolǵa aldy. Bul oblystaǵy tazartylǵan ósimdik maıyn óndiretin alǵashqy qýatty maı zaýyty bolyp tabylady. Sońǵy jyldary Qostanaı oblysynda óńdeý ónerkásibi shıkizattyń aldyna shyqqan bolatyn. Ádette, aýyl sharýashylyǵy ónimderin óńdeý kásiporyndary kóbine Qostanaı qalasynyń aınalasyna ornyǵatyn. Mine, endi sol óńdeý kásiporyndarynyń biregeıi oblys ortalyǵynan alys Fedorov aýdanynan oryn tepti. Bul qara topyraqty qunarly óńirde kúnbaǵys ta, zyǵyr da egiledi. Sońǵy jyldary oblystaǵy egin alqaptaryn ártaraptandyrý jyldam júrip jatyr. Dıqandar bıdaıdyń alqabyn azaıtyp, naryqta baǵasy qymbat ári ótimi jaqsy maıly daqyldarǵa bet bura bastaǵan.
– Jańa maı zaýytynyń ınfraqurylymy oblys bıýdjeti esebinen múmkin boldy. Aýdanǵa kelip turǵan gaz qubyryna jalǵanysymen zaýyt tolyq jumys isteı bastaıdy. Gaz qubyryn óndiriske jalǵaý ǵana qaldy. Gazben qatar óndiriske sý da kerek, ol da oblys basshylyǵynyń kómegimen sheshimin tabatynyna senimdimiz, – deıdi «Prombaza-7» jaýapkershiligi shekteýli seriktestiginiń dırektory Muhamedjan Aqulov.
Zaýytta maı eki jeli arqyly óndiriledi. Burynnan jumys istep turǵan jelide tutynýshyǵa tanys «Lavra» maıy óndiriledi. Al ekinshi jańadan ornatylǵan jelide syǵylǵan maı odan ári tazartylady. Muhamedjan Aqulovtyń aıtýynsha, tazartylǵan maı tek eksportqa artýǵa baǵyttalǵan. Kásipker ónimdi ótkizýden eshqandaı qıyndyq bolmaıtynyn da aıtty. Tazartylǵan ósimdik maıyna Qytaıda da, Reseıde de, ózge elderde de suranys joǵary. Zaýyt shıkizatty oblys óńirindegi, kórshi Reseıdiń irgeles sharýashylyqtarynan satyp alady. Kúnbaǵys kúnjarasynan mal jemi daıyndalady. Jańa maı zaýytyn oblys ákimi Arhımed Muhambetov aralap, ınvestısııalyq jobanyń iske qosylýǵa daıyn ekenin kórdi. Jańa zaýyt tolyq qýatyna kóshkende munda 30 adam jumys isteıtin bolady.
Maı zaýyty ashylǵan kúni Fedorov aýdany ortalyǵyna kógildir otyn da keldi. Selo ishindegi gaz qubyrlarynyń ótken jyly bastalǵan qurylysynyń birinshi kezeńi aıaqtaldy. Oblys ákimi Arhımed Muhambetov seloǵa gaz berý saltanatyna qatysyp, turǵyndardy qýanyshymen quttyqtady.
– Elbasy Nursultan Nazarbaevtyń «Bes áleýmettik bastamasy» aıasynda Fedorov selosyn gazben qamtamasyz etip otyrmyz. Osydan eki jyl buryn úlken magıstraldy gaz qubyrynyń qurylysy aıaqtalǵan bolatyn. Rýdnyı qalasynan bastalǵan 68 shaqyrymdyq qubyr Qashar kenti arqyly Fedorov aýdanyna jetkizilgen edi. Endi ótken jyly Fedorov selosynyń ishine qubyrlar júrgizile bastady. Munyń barlyǵy Prezıdentimizdiń qamqorlyǵy arqasynda múmkin bolyp otyr. Gaz adamdar turmysyn kóriktendirip, ál-aýqatyn jaqsartady, – dedi Arhımed Begejanuly.
Fedorov selosynda kelesi jyldyń mamyr aıynda gaz qubyry qurylysynyń ekinshi kezeńi, al kúzge qaraı úshinshi kezeńi tolyq aıaqtalady.
– Aýyldastardyń qýanyshynda shek joq. Gaz degen rahat ǵoı, ári taza, ári jyly, ári arzan. Ot jaǵýdyń beınetinen arylatyn boldyq. Elbasyna, oblys, aýdan basshylaryna, gazshylarǵa úlken rahmet! – dep, aqjarma qýanyshyn bildirdi Fedorov selosynyń turǵyny Rysaldy Esmuhambetova.
Aýdanda 3000 abonent – 12 myń adam kógildir otynnyń ıgiligin kóredi.
Sol kúni aýdan ortalyǵyndaǵy Mádenıet saraıy fedorovtyqtarǵa lyq toldy. Aýdannyń qurylǵanyna 90 jyl tolý merekesi atap ótildi. Elbasy «Uly dalanyń jeti qyry» atty maqalasynda: «Ýaqyt pen keńistiktiń kókjıegi toǵysqan kezde ult tarıhy bastalady» degen bolatyn. Fedorov aýdanynyń tarıhy da el, óńir tarıhynyń bir bólshegi. Osy mereıli merekege baılanysty saltanatty jıynda aýdan ákimi Táýba Isabaev óńir tarıhyn, aǵa urpaqtyń erligi men eńbegin baıandap berdi. 1928 jyly qurylǵan aýdannyń baı tarıhy bar. Bul óńir ujymdastyrýdyń, ashtyqtyń, saıası qýǵyn-súrginniń, soǵystyń alapat qasireti men qıyndyqtaryn bastan keshti. Tyń jáne tyńaıǵan jerler ıgerildi. Bul aýdannan 2 Keńes Odaǵynyń Batyry, 12 Sosıalıstik Eńbek Eri shyqty. Fedorov aýdanynyń dıqandary bıyl gektar aınalymyn 16,5 sentnerden keltirip, 500 myń tonna astyq jınady.
Qazir aýyl damýdyń jańa jolyna tústi, Fedorov aýdany da solardyń qatarynda. Jyl saıyn aýyl sharýashylyǵymen qatar óndiris, óńdeý ónerkásibi ósip keledi. Memlekettik baǵdarlamalar júzege asyp jatyr. О́ńdeý ónerkásibi aýyldy áleýettendiredi, joldyń túzelip, gaz, sý qubyrlarynyń kelýi týǵan jerdi ajarlandyrady.
Názıra Járimbet,
«Egemen Qazaqstan»
Qostanaı oblysy,
Fedorov aýdany