Jambyl oblysynyń ákimi Asqar Myrzahmetovtiń qatysýymen óńirdegi dinı ahýaldyń jaı-kúıi men din salasyndaǵy memlekettik saıasatty iske asyrý boıynsha ótken jyly atqarylǵan jumystar týraly jıyn ótti.
Jıyn barysynda oblystyq Din isteri basqarmasynyń basshysy Jangeldi Omarov baıandama jasap, byltyr jyl basynda jasalǵan oblys ákimi men qala jáne aýdan ákimderi arasyndaǵy basqarmaǵa tıesili eki ındıkatorlyq kórsetkishtiń tolyǵymen oryndalǵanyn atap ótti. Sondaı-aq, basqosýda ótken jyldyń 3 mamyrynda oblys ákiminiń tóraǵalyǵymen ótkizilgen keńestiń №51 hattamasyna sáıkes berilgen tapsyrmalardyń oryndalý barysy da talqylandy.
Basqarmanyń málimetine súıensek, ótken jyly «Nur Múbárak» ýnıversıtetiniń oqytýshylary quramynyń qatysýymen óńirdegi 100 ımamǵa arnalǵan eki aptalyq oqytý kýrsy uıymdastyrylǵan. Buǵan deıin ımamy bolmaǵan oblystaǵy 16 meshittiń de máselesi tolyǵymen sheshilip, dinı qyzmetshilermen qamtylǵan. Sonymen qatar, basqarma basshysy mektepterdegi «Zaıyrlylyq jáne dintaný negizderi» páninen sabaq beretin barlyq muǵalimderdiń arnaıy kýrstan ótkenin de jetkizdi. Sonymen qatar, pándi meńgerý deńgeıin anyqtaý úshin 450 muǵalim jáne 16127 oqýshynyń qatysýymen testileý júrgizilgen.
Deı turǵanmen, sheshimin tappaǵan máseleler de aıtylmaı qalmady. Atap aıtsaq, 23 hattamalyq tapsyrmanyń 14-i ǵana sheshimin tapsa, qalǵany oryndalmaǵan bolyp shyqty. О́ńirdegi jeke menshik ıeligindegi meshitterdiń ǵımarattary men jer telimderin Qazaqstan musylmandary dinı basqarmasynyń menshigine ótkizý máselesi tolyǵymen sheshimin tappaǵan. Búginde 19 meshittiń qujattary rásimdelýde desek, 4 meshitti Qazaqstan musylmandary dinı basqarmasynyń menshigine ótkizý máselesinde kedergiler týyndaýda. Tipti, shetelde dinı bilim alyp jatqan 26 azamattyń 10-y senimdi, 16-y kúmándi oqý oryndarynda oqyp jatyr eken. Bul rette ákim oqytý kýrsy men mekteptegi «zaıyrlylyq jáne dintaný negizderi» pániniń taqyryptaryn tolyqtyryp, naqtylaýǵa basqarmanyń atsalysý kerektigin eskertti. Sondaı-aq, jeke menshiktegi meshitterdi Qazaqstan musylmandary dinı basqarmasynyń menshigine ótkizýde tııanaqty jumys júrgizýdi tapsyrdy.
Jıyn barysynda ákim dinniń urpaq tárbıesindegi mańyzdylyǵyn aıryqsha atap ótip, jas urpaqtyń boıyndaǵy ıman men bilim arqyly qoǵamdaǵy ádiletsizdikter men arsyzdyqtardy aıtarlyqtaı azaıtýǵa bolatynyn jetkizdi.
Hamıt ESAMAN,
«Egemen Qazaqstan»
Jambyl oblysy