Polısııa qyzmetkerleri jol tártibi erejelerin óreskel buzǵan mas júrgizýshini kúshpen toqtatýǵa týra keldi.
«Mersedes» avtokóligimen jeldeı júıtkigen júrgizýshi jol-patrýl polıseıleriniń toqtaý týraly belgisine moıynusynbaǵan. Kúshtep toqtatylǵan buzaqy kólik salonynan shyǵýdan bas tartyp, onyń aqyry polısııa avtokóligin soǵyp, zaqymdaýǵa ákelgen.
«Mas júrgizýshini quryqtaý úshin tártip saqshylary kúsh qoldanýǵa májbúr boldy» delingen Polısııa departamenti baspasóz qyzmeti taratqan habarlamada.
Tekserý barysynda 1978 jyly týǵan Petropavl qalasy turǵynynyń buryn júrgizýshi kýáliginen aıyrylǵany, sol sııaqty jeńil dárejedegi alkogoldik masań kúıde bolǵany anyqtaldy. Onyń jol tártibi erejelerin óreskel buzý jáne zań tártibine baǵynbaý áreketterine baılanysty quqyq buzýshylyq ákimshilik hattama toltyrylyp, jedel-tergeý tobyna tapsyryldy. Oqıǵa boıynsha Qylmystyq Kodekstiń «Bılik ókiline qatysty kúsh qoldaný» baby boıynsha sotqa deıingi tergep-tekserýdiń biryńǵaı tizimine engizildi.
Petropavl qalasy 1-shi polısııa bóliminiń bastyǵy, polısııa polkovnıgi Balabek Jahınniń aıtýynsha, bıyl sotqa deıingi tergep-tekserýlerdiń biryńǵaı tizimine polısııa qyzmetkerlerine baǵynbaýdyń ekinshi faktisi tirkelip otyr.
О́mir ESQALI,
«Egemen Qazaqstan»
Soltústik Qazaqstan oblysy