Belgili túrkolog, Mıchıgan ýnıversıtetiniń professory Tımýr Qojaoǵly «Egemen Qazaqstan» gazeti Túrki áleminde mańdaıaldy basylymǵa aınalǵanyn málimdedi. Bul týraly ol Facebook jelisindegi paraqshasynda jarııalady.
Mármara, Koch ýnıversıtetterinde qyzmet etken professor «Egemen Qazaqstan» gazeti Ysmaıyl Gaspyraly negizin qalaǵan «Tárjiman» gazetinen keıin jaryq kórgen bedeldi basylym ekenin atap ótip, gazette kóptegen Alash arystary eńbek etkenin jetkizdi.
«100-jylyna qadam basqan «Egemen Qazaqstan» gazetiniń negizi 1919 jyly 17 jeltoqsanda «Ushqyn» degen atpen qalanǵan bolatyn» dedi.
Sonymen qatar, Mıchıgan ýnıversıtetiniń professory Egemen Qazaqstan gazeti túrki áleminiń eń bedeldi basylymyna aınalǵanyn atap kórsetti.
«Gazettiń ereksheligi – burynǵy keńestik tıptegi gazet ornyna zamanaýı jýrnalıstıka etıkasy men qyr-syryn sátti ushtastyrýy. Oǵan qosa jaqynda atalmysh basylym Nıý-Iork Taıms gazetimen kelisimge qol qoıǵan bolatyn», deıdi professor.
Sóz sońynda «Ystyq yqylasymmen Egemen Qazaqstan gazetine aq jol tileımin» delingen.
Tımýr Qojaoǵly – Buhara Halyq Keńes Respýblıkasynyń prezıdenti Osman Qojaoǵlynyń uly. Doktorlyq dıssertasııasyn Kolýmbııa ýnıversıtetinde «Keńestik Ortalyq Azııa prozasyndaǵy Post-Stalın zamanynyń ulttyq erekshelikteri» taqyrybynda jazǵan. Onyń Keńes Odaǵyndaǵy túrki halqynyń álipbıiniń arab grafıkasy men latyn grafıkasyna ótýi týraly ǵylymı maqalalary bar.