Parlament Májilisiniń depýttary- Áleýmettik-mádenı damý Komıtetiniń músheleri Túrkistan oblysyna jasaǵan sapary barysynda Qoja Ahmet Iаsaýı kesenesine zııarat etip, ortaǵasyrdaǵy tarıhı-mádenı mura obektileriniń tarıhı kelbetin anyqtaýǵa jáne qalpyna keltirýge arnalǵan jobalarmen jáne Túrkistan qalasy aýmaǵyndaǵy eń kóne qonystardyń biri Kúltóbe qalashyǵymen tanysty.
Elbasy N.Á.Nazarbaevtyń «Sıfrly Qazaqstan» jobasy negizinde qoryq-mýzeıge qarasty Qoja Ahmet Iаsaýı kesenesi men Qylýet jerasty meshiti, Shyǵys monshasy, Gaýhar ana, Ýkasha ata kesenesi men qudyǵy, Saýran qalashyǵy syndy tarıhı oryndardyń 3D týr nusqasy daıyndalyp, halyqaralyq kórmelerde alǵash ret kórsetilip, kózildirik arqyly tanystyrylǵan bolatyn. Sondaı-aq, Qoja Ahmet Iаsaýı kesenesinde jerlengen qazaqtyń han-sultandary men bı-abyzdary,batyrlary men ıgi jaqsylary tizimi sıfrly formatta ázirlenip, tulǵalar jaıynda qysqasha málimet te úsh tilde jazylǵan.
Q.A.Iаsaýı, Esim han, Rabııa Sultanbegim keseneleri men Juma meshiti mýzeıi, Qylýet jerasty meshiti mýzeıi, Shyǵys monshasy mýzeılerine sıfrlandyrý boıynsha shtrıh kod jasalynǵan. Atalǵan jumystarmen tanysqan halyq qalaýlylary qoryq-mýzeı qorynda Ámir Temir dáýirinen saqtalǵan qasıetti taıqazan, laýha (týdyń ushy), shyraǵdandar, esikter, Q.A.Iаsaýıdiń «Dıýanı hıkmet» kitabynyń qoljazbalary men kórmeni de tamashalady.
Memleket Basshysy N.Á.Nazarbaevtyń «Uly dalanyń jeti qyry» baǵdarlamalyq maqalasy men qalany túrki dúnıesiniń rýhanı astanasy retinde tanytý jáne tarıhı oryndardyń tól kelbetin saqtaı otyryp, jandandyrý maqsatynda QR Mádenıet jáne sport mınıstrligi Túrkistan qalasyndaǵy 88,7 gektar aýmaqta ornalasqan «Han meshiti», «Han ordasy» jáne Kúltóbe qalashyǵy men «Jeti ata», «Darbaza», «Músálla», «Tákııa» qaqpalary tolyǵymen qalpyna keltirilip, týrıstik baǵytqa qosylmaq.
Bıyl Qoja Ahmet Iаsaýı kesenesi mańyn abattandyrý jumystary qolǵa alynady. Qala qorǵandarynyń oryndaryna arheologııalyq qazba jumystary júrgizilip, qaıta qalpyna keltirý jumystary kezeń-kezeńimen júzege asyrý kózdelýde. Ortaǵasyrlyq magıstraldyq kóshelerge de qazba jumystary júrgizilip, saýda-sattyq oryndary týrısterge qyzmet kórsetetin bolady.
Sonymen qatar, Memleket Basshysynyń Túrkistan qalasyna kelgen resmı saparyndaǵy arnaıy tapsyrmasyna sáıkes, kesene ishindegi birneshe jyldan beri paıdalanýsyz turǵan qudyq iske qosylǵan.
Sapar Qazaqstan Respýblıkasy Parlamenti Májilisi Áleýmettik – mádenı damý komıtetiniń «Tarıhı-mádenı murany qorǵaý men keńinen tanytýdy zańnamalyq turǵydan qamtamasyz etý» degen taqyrypta kóshpeli otyrysyna ulasty.