Sybaılas jemqorlyqqa qarsy is-qımyl ulttyq bıýrosynyń oblystyq departamenti ótken jyly 75 zań buzýshylyq faktisin áshkerelegen.
Bul 2017 jylǵy kórsetkishke qaraǵanda eki ese kóp. Vedomstvo basshysy Ashat Jumaǵalı Mamlıýt, Taıynsha aýdandarynyń burynǵy ákimderiniń, sondaı-aq, Petropavl qalasy men oblys ákimdiginiń birqatar memlekettik qyzmetshileriniń para alý ústinde áshkerelengenin, qarjylyq alaıaqtyq áreketteri, sybaılas jemqorlyq bılik organdarynda jıi kezdesetinin atap kórsetti.
«Byltyr 63 is sotqa jiberildi. Olardyń arasynda memlekettik sáýlet-qurylys baqylaý jáne lısenzııalaý basqarmasynyń burynǵy basshysy Murat Abylaevqa qatysty is bar. Memlekettik qyzmet kórsetý salasynda qylmystyq áreketterge barǵan sheneýnik qyzmet babyn asyra paıdalanyp, myńdaǵan dollardy qaltasyna basqan. Onyń kómegine, tipti, Astana, Aqtaý, Shymkent qalalarynyń azamattary da júgingen», deıdi sybaılas jemqorlyqqa qarsy is-qımyl ulttyq bıýrosy oblystyq departamentiniń basshysy Ashat Jumaǵalı.
Qara basynyń qamyn oılap, abyroıyna kir keltirgen Murat Abylaev segiz jylǵa bas bostandyǵynan jáne memlekettik qyzmette jumys isteý quqyǵynan aıyrylǵan.
Qylmystyq jaýapkershilikke tartylǵan 35 laýazymdy tulǵanyń 14-i –ákimdik qyzmetshileri. Birneshe jyl qatarynan ákimdiktegiler sybaılas jemqorlyqqa eń beıim memlekettik qyzmetshiler bolyp otyr.
О́mir ESQALI,
«Egemen Qazaqstan»
Soltústik Qazaqstan oblysy