«Rýhanı jańǵyrý» baǵdarlamasynyń sheńberinde ótken jastardyń ashyq konferensııasyna azamattyq sektordan, bıznes pen ǵylymı qoǵamdastyqtardan ókilder qatysty. Osymen altynshy ret bas qosyp otyrǵan jastar «Álemdegi jahandasý jaǵdaıynda jastardyń básekege qabilettiligi» degen taqyrypty talqylady.
«Bul konferensııa 2018 jyly oblystyq ishki saıasat basqarmasynyń bastamasymen bastalǵan bolatyn. Onyń negizgi maqsaty – jastar úshin jáne jalpy azamattyq qoǵamda Elbasy bastamalaryn, «Rýhanı jańǵyrý» baǵdarlamasyn, onyń baǵyttaryn túsindirip, ony neǵurlym tereńirek bilýin qamtamasyz etý bolatyn. Búgingi ashyq konferensııaǵa biz 4 spıker shaqyrdyq. Búgingi taqyryp jastardyń básekege qabilettiligi bolǵandyqtan, spıkerler ony ózderiniń salalarynda alyp qaraıdy. Jastardyń qoıǵan suraqtaryna jaýap beredi, taqyrypty ortaq talqylaıdy» dedi Oblystyq ishki saıasa basqarmasynyń bólim basshysy Abylaı Kákenov.
Bıyl jastar jyly bolǵandyqtan Oblystyq ishki saıasat basqarmasy qyzmetkerleri ashyq konferensııanyń taqyrybyn osylaı jastarǵa arnapty. Konferensııada respýblıkalyq, halyqaralyq IT olımpıadalardyń birneshe dúrkin jeńimpazy Maksım Rıýmın, «Ýnıkým» jyldam oqý jáne ıntellektini damytý mektebiniń jetekshisi Sholpan Nurqanova, ózindik damý jolynda trenıngter ótkizip júrgen Vladımır Aleksanın, «Jas Otan» jastar qanatynyń kóshbasshysy Álibek Muhamedjanov jastarǵa jetistikteri týraly aıtyp berdi, kókeıde júrgen oılaryn ortaǵa saldy, suraqtarǵa jaýap berdi.
Abylaı Kákenovtyń aıtýynsha, áleýmettik jeliler arqyly arnaıy onlaın alańyn quryp, pikirtalas alańynda aıtylǵan máselelerdi, onda jınalǵan oılardy, bastamalardy túgendep, olardyń júzege asý jaqtary qarastyrylady.
Názıra JÁRIMBET,
Egemen Qazaqstan
Qostanaı