Áýlıeata óńiriniń mádenıetin damytý maqsatynda osy ýaqytqa deıin aýyldyq jerlerdegi mádenıet nysandarynyń jumysyn júıelendirý, arhıvterdi sıfrlandyrý, aqparattyq ortalyq qurý, budan ózge oblysta ótetin mádenı kópshilik is-sharalardyń mańyzdylyǵyn arttyrý sekildi jumystar atqarylǵan bolatyn.
Áýlıeata óńiriniń mádenıetin damytý maqsatynda osy ýaqytqa deıin aýyldyq jerlerdegi mádenıet nysandarynyń jumysyn júıelendirý, arhıvterdi sıfrlandyrý, aqparattyq ortalyq qurý, budan ózge oblysta ótetin mádenı kópshilik is-sharalardyń mańyzdylyǵyn arttyrý sekildi jumystar atqarylǵan bolatyn. О́ńir mádenıetin damytý maqsatynda Jambyl oblysynyń ákimi Asqar Myrzahmetovtiń qatysýymen ótken jıynda oblystyq mádenıet, arhıvter jáne qujattama basqarmasynyń basshysy Dúısenáli Byqybaev mindettelgen mejelerdiń kórsetkishterine toqtaldy. Onyń aıtýynsha, oblys ákimi men aýdan ákimderi, basqarma men aýdan ákimderi arasyndaǵy naqtylanǵan mejeli ındıkatorlardyń arqasynda saladaǵy jumystar júıelenip, oń nátıjeler bere bastaǵan.
Máselen, oblys ákiminiń tapsyrmasyna sáıkes byltyr aýdandarda 71 sıfrlandyrylǵan aqparattyq ortalyq ashylǵan bolatyn. Bul negizinen aýyl turǵyndarynyń ıgiligine arnalǵanyn aıta ketý kerek. Aýyldyqtar ortalyq arqyly búginde «www.egov.kz» portalymen 6 túrli memlekettik qyzmetti alýda. Sondaı-aq, byltyr birqatar jastardyń bas qosatyn pikirtalas alańdary – kovorkıng ortalyqtary da el ıgiline berilgen. О́ńirdegi kitaphanalar mobıldi standartqa kóshirilip, «Qasıetti Taraz» saıty óz jumysyn bastaǵan.
Basqarma basshysy óz sózinde ótken jyly óńirde Áljan ana mýzeıi, Jýaly aýdandyq tarıhı-ólketaný mýzeıi men «Jeltoqsan, 86» ortalyqtarynyń ashylǵanyn jetkizdi. Shyǵarmashylyq salasynda da jumystar bar degen basqarma basshysy óńirdegi óner ujymdarynyń sheteldermen mádenı baılanysy nyǵaıa túskenin aıtyp ótti.
Jıynda aǵymdaǵy jylǵa arnalǵan josparly sharalar da aıtyldy. Bıyl Jambyl oblysynyń 80 jyldyq mereıtoıy desek, basqarma bul oraıda ólke shejiresinen syr shertetin kóptomdyq kitaptyń alǵashqy 80 tomyn jaryqqa shyǵarýdy kózdep otyr. Budan bólek, aýqymdy 7 mádenı shara ótedi dep kútilýde. Sonyń biri byltyr bastaý alǵan «Jambyl – meniń jaı atym, Halyq – meniń shyn atym» atty respýblıkalyq aqyndar aıtysy. Qazirgi tańda respýblıkalyq aıtystyń aýdandyq, oblystyq irikteýleri ótip, oǵan óńirimizdegi 100-den astam talanttar qatysyp, baq synaýda.
Atqarylǵan sharýalar az emes, alaıda, túıtkildi máseleler de bar bolyp shyqty. Máselen, óńirde óner mektebin ashý týraly usynys áli berilmegen. 26 eldi mekenge klýb qajet desek, tıisti sharalar aýdan ákimderi tarapynan sylbyr atqarylýda eken. Qordaı men Shý aýdandaryndaǵy memlekettik arhıvteri ǵımarattarynyń jaı-kúıi de nazarǵa alyndy. Al, Taraz qalasyndaǵy Shoqan Ýálıhanov atyndaǵy oblystyq ámbebap-ǵylymı kitaphanasy ǵımaratynyń syrtyna jóndeý jumystarynyń qajettigi de sóz boldy.
Hamıt Esaman,
«Egemen Qazaqstan»
Jambyl oblysy