Buǵan deıin Qostanaı, Qyzylorda, Aqtóbe, Jambyl, Soltústik Qazaqstan oblystarynyń aýmaǵynda Dúnıejúzilik bank pen Bilim jáne ǵylym mınıstrliginiń qoldaýymen júzege asyrylǵan qanatqaqty joba mine, Semeı qalasyna da kelip jetti. Bul jobany Úılestirý agenttigi Jastar korpýsyn damytýshy «Zhas projekt» dep atap otyr. Jobanyń basty maqsaty ásirese, aýyl jastaryn nátıjeli jumyspen qamtý jáne olardyń qajetti daǵdylaryn damytý arqyly, qoǵamdyq paıdaly qyzmetke tartý bolyp tabylady.
Semeıde ótken «Zhas projekt» oblystyq forýmynyń joba tanystyrylymyna qala ákiminiń orynbasary Nadejda Sharova, ishki saıasat bóliminiń bastyǵy Nurjan Esenjolov, Úılestirý agenttiginiń aımaqtyq úılestirýshisi Serik Júnisov jáne taǵy basqalary qatysty.
- «Zhas projekt» jobasy Semeı qalasynda ótip, oǵan 14-ten 29 jasqa deıingi jastar qatysyp otyr. Bul jobaǵa jalpy orta bilim berý mektebiniń oqýshylarynan basqa, kolledj jastary da óz úlesterin qosýda. Joba eń aldymen óz áleýetin, ómirlik mańyzy bar daǵdylary men kóshbasshylyq qasıetterin damytýǵa múddeli jastar úshin óte qajetti sharýa,-dedi Semeı qalalyq Jastar Resýrstyq Ortalyǵynyń dırektory Oljas Soǵymbaı.
Jobadaǵy qarajat negizinde tabysy tómen qatysýshylarǵa beriledi. Shyǵys jastarynyń Semeıde ótkizilgen osynaý oblystyq forýmy «Zhas project»-iń kóptegen bıznes jobalary kópshilikti erekshe tań qaldyrdy. Uıymdastyrýshylardyń aıtýynsha oblysta 149 joba júzege asqan.
О́z usynystaryn bildirgen 491 qatysýshy 1 000 000 teńge kólemindegi shákirtaqyǵa ıe bolǵan. Forým barysynda arnaıy kórme uıymdastyrylyp, jastar óz ónimderin tanystyrýǵa múmkindik aldy. Keıbir qatysýshylar qonaqtarǵa tabıǵı sút ónimderin usynsa, endi bireýleri ózderiniń kádesyılyq buıymdarymen kópshilik nazaryn aýdardy.
Muhtar Áýezov atyndaǵy pedkolledj stýdenti Nurlan Tóleýtaev aldyn ala kórermen retinde kelip qatysyp, ózi Abaı aýdany Sarjal aýylynyń týmasy retinde ulttyq aspaptar men ulttyq órnekterdi daıyndap, halyqqa usynýdy jolǵa qoımaqpyn degenoıymen bólisti.
Sol sııaqty Abaı aýdanynan kelgen Serikjan Saǵynbekov joba aıasynda qus sharýashylyǵyndaǵy jetistikterimen bólisti. Serikjan jobasynyń negizgi ereksheligi altyn taýyq jumyrtqasy. Joba avtorynyń aıtýynsha ónimge degen suranys joǵary. Jas qatysýshy turmys jaǵdaıy tómen otbasylarǵa óz ónimderin tegin taratady.
Sol sııaqty Balnur Esbolatova jastarǵa tálim-tárbıe bergendikterin aıtyp, bolashaqta osy joba aıasynda áleýmettik mektep ashyqysy keletinin, onda jýrnalıstıkaǵa, aǵylshynǵa, taǵy basqa kerek mamandyqtarǵa tegin úıretsem degen oıyn aıtty.
- Men eshki sútiniń paıdasy halyqqa kerek ekenin kórdim,-dedi Tarbaǵataı aýdanynan kelgen psıholog Aıdana Serjanqyzy,-sondyqtan osyny damytyp, aldaǵy ýaqytta eshki sútinen irimshik, qurt jáne taǵy basqa ónimderdi óndirip, múgedek jandarǵa, jaǵdaıy tómenderge tegin taratsam degen oıym bar. Biz aldyn ala zertteýler júrgizdik. Qant dıabeti, asqazan-ishek aýrýlary bar naýqastar on kún eshkiniń sútin ishken soń, jaǵdaılary jaqsardy.
Semeı qalasy ákiminiń orynbasary Nadejda Sharova jastar ózderine júktelgen jaýapkershilikti sezine bilip, senimdi aqtaǵandaryn atap ótti. Nadejda Sharovanyń aıtýynsha forým qatysýshylarynyń bolashaqta bilikti kásipker bolý yqtımaldyǵy joǵary. Jobanyń qatysýshylaryna aı saıyn áleýmettik shákirtaqylar tólendi, máselen 60 000 teńge – JOO-nyń túlekterine, 40 000 teńge – qalǵan barlyq qatysýshylarǵa dep belgilengen.
Jobany iske asyrýdyń mańyzdy kezeńi qorytyndylary bolyp tabylady. Aımaqtyq forým ashylyp, onda jobalardy iske asyrý kezinde daıyndalǵan ónimderdiń kórmesi ótkizilmek. Semeıdegi forýmǵa memlekettik organdar, «Atameken» UKP, «Damý» QQ ókilderiniń, máslıhat depýtattary qatysty.
Raýshan QABJANQYZY,
«Egemen Qazaqstan»
Semeı