Sońǵy jyldary álemdik týrızmniń asa qyzyǵýshylyǵyn týdyryp otyrǵan damýshy memleket Úndi muhıt endiginde ornalasqan Mavrıkıı aralynyń astanasy Port-Lýı qalasynda IýNESKO-nyń Materıaldyq emes mádenı murany qorǵaý jónindegi komıtetiniń kezekti sessııasy bolyp ótti.
Mártebeli basqosý barysynda halqymyzdyń jylqy mádenıeti, sonyń ishinde kóneden kele jatqan «Bıe baılaý», «Aıǵyr qosý» jáne «Qymyzmuryndyq» sııaqty dástúrli joralǵylary «Qazaq jylqyshylarynyń dástúrli kóktemgi ádet-ǵuryptary» degen atpen IýNESKO materıaldyq emes mádenı murasy retinde moıyndalyp, mártebeli tizimge endi.
Qazaqstan ókilderi tolyqqandy múshe retinde alǵash ret qatysqan kezekti jıynnyń beldi múshesi «Ulytaý» ulttyq tarıhı, mádenı jáne tabıǵı qoryq-mýzeı dırektory Baqtııar Qojahmetovtiń aıtýynsha, halqymyzdyń jylqy mádenıetin damytyp, saqtap otyrǵan óńirdiń biri – Ulytaý bolsa, sonyń ishinde Terisaqqan boıynda atalmysh dástúr ejelgi kelbetinen ajyraı qoımaǵan. Osyndaı irgesi sógilmegen dástúrli mádenıetimizdi álemge tanytý úshin qoryq-mýzeı júıeli jumys jasaýda eken.
Atap aıtar bolsaq, sońǵy jyldary «Terisaqqan kóktemi» atty halyqaralyq festıval uıymdastyryp, 20 mınýttyq aǵylshyn tilinde shaǵyn fılm túsirgen. Osy sharaǵa Qazaqstan Respýblıkasynyń IýNESKO jónindegi Ulttyq komıtet tóraǵasy Hanzada Esenova jáne uıym músheleri Emma Ýsmanova, Elena Horosh kelip qatysqan.
Osy adamdardyń yqpaldastyq tanytýynyń arqasynda joǵarydaǵy derekti fılm «Qazaq jylqyshylarynyń dástúrli kóktemgi ádet-ǵuryptary» degen atpen IýNESKO-nyń resmı saıtynda jarııalaný múmkindigine ıe bolsa, mádenı shara ótken jyly da jalǵasyp «Kókmaısa» degen atpen Ulytaýda ótkizilipti.
«Festıvldyń aýqymy jyldan-jylǵa keńeıip keledi ári sheteldik týrısterdiń de qyzyǵýshylyǵy artýda. Onyń ber jaǵynda IýNESKO-nyń arnaıy tizimine jylqy joralǵylarynyń enýi − onyń halyqaralyq qorǵalýyna kepil. Iаǵnı, ata muramyz kózdiń qarashyǵyndaı saqtalyp, keıingi urpaqqa mura bolyp qalady degen sóz», deıdi qoryq-mýzeı basshysy.
Beken QAIRATULY,
«Egemen Qazaqstan»