Búgingi tańda elimizde dene shynyqtyrý, sportty damytý, turǵyndardyń densaýlyǵyn nyǵaıtý jáne jastar arasynda salamatty ómir saltyn nasıhattaýǵa tıisti kóńil bólinip keledi. Táýelsizdik jyldarynda elimizden talaı sport sańlaqtary shyǵyp, álemdik arenada baıraǵymyzdy bıikte jelbiretti.
Osydan segiz jyl buryn alǵashqy kirpishi qalanǵan Taraz qalasyndaǵy «Taraz-Arena» sport saraıy da elimizdegi sportty damytý maqsatyndaǵy ıgi bastamaǵa ózindik úles qosýda. Jalpy quny 5 mıllıard teńgege jýyq qarajat jumsalǵan mekeme 2013 jyly halyq ıgiligine berildi. Sodan bergi ýaqytta atalǵan sport saraıy el sportynyń damýyna úles qosyp, álemdik, halyqaralyq deńgeıde jeńimpazdardy daıyndap keledi.
«Taraz-Arena» mekemesiniń dırektory Nurlan Saýryqovtyń aıtýynsha, munda sportshylarǵa ámbebap zal, kishi sport zal, aýyr atletıka zaly, boks zaly, júzý basseıni sııaqty 12 sport zaly qyzmet kórsetedi eken. Sonymen qatar, mekeme arnaıy medısınalyq qabınetpen jáne qajetti zamanaýı standartqa saı sporttyq qural-jabdyqtarmen qamtylǵan. Taǵy bir aıta keterligi, sport kesheniniń bes aýysymdaǵy ótkizý qabilettiligi joǵary, syrtqy alańdardy qosqanda 15 sport túrimen 2500-ge tarta sportshy bir kúnde sportpen shuǵyldanýǵa múmkindik alady.
Árıne, árbir azamattyń salamatty ómir saltyn ustanyp, sportpen shuǵyldanýy quptarlyq is. Memlekettiń sport salasyna tıisti kóńil bólýiniń nátıjesinde «Taraz-Arena» sport saraıynda jattyǵatyn óńir sportshylary da joǵary jetistikterge qol jetkizýde. Rıoda ótken Paralımpıada oıyndarynyń jeńimpazy, Qazaqstan Respýblıkasynyń eńbek sińirgen sport sheberi Zúlfııa Gabıdýllınanyń jetistiginiń ózi bir mártebe. Jergilikti bıliktiń batyr qyzǵa degen qurmeti retinde jeke úı salyp bergeni de el esinde. Talaı bıikti baǵyndyrsa da sol bir qarapaıym qalpynan aınymaǵan asyl adam jóninde kóp nárse aıtýǵa bolady. Ol sportta óziniń laıyqty baǵasyn aldy. Endigi jerde búgingi jastarǵa, bolashaq jeńimpazdarǵa úlgi retinde Zúlfııa Gabıdýllına esimin este ustaý qajet.
Eldiń atyn qashanda er shyǵarady. Búginde elimizde Gennadıı Golovkın, Serik Sápıev, Dmıtrıı Balandın sııaqty áıgili sportshylardyń atynda sport saraılary bar. Bir jaǵynan eńbekti eskerý, ekinshi jaǵynan jastarǵa úlgi retinde qolǵa alynǵan bul bastamanyń áli talaı sport sańlaqtaryna qýat beretini sózsiz. Budan keıin árbir sportshynyń kókeıinde osy kúnge jetsem degen úmit shyraǵynyń mazdaıtyny da ras. Bul rette álem rekordyn jańartqan Zúlfııa Gabıdýllınanyń da eńbegin atap ótpeske bolmaıdy. Tipti «Taraz-Arena» sport saraıynyń ishindegi júzý basseınin bolashaqta Zúlfııa Gabıdýllınanyń esimimen atasa da artyq bolmas edi. Ári jeńimpazdyń ózi atalǵan mekemeniń osy júzý basseıninde jattyǵyp, bıik belesti baǵyndyrǵany da belgili. Qazirdiń ózinde Zúlfııa basseınge kelgende talaı sportshynyń onyń sheberliginen tálim alatyny ras. Bul týraly Qazaqstan Respýblıkasynyń Eńbek sińirgen jattyqtyrýshysy Sattar Beısembaevtyń da aıtary bar eken.
«Men Zúlfııany 2007 jyldan beri jattyqtyryp kelemin. Ol kezderde qalada «Taraz-Arena» sııaqty sport kesheni joq bolatyn. О́zim sol ýaqytta oblystyq dene shynyqtyrý jáne sport basqarmasynda qyzmet atqara júrip, jumystan tys ýaqytta Zúlfııa Gabıdýllınamen jeke jumys istedim. Áýeli «Delfın» basseıninde, M.H.Dýlatı atyndaǵy Taraz Memlekettik ýnıversıtetiniń sport zaldarynda jattyǵý ótkizip júrdik. Keıinnen Zúlfııa «Taraz-Arena» kesheninde sheberligin shyńdady. Nátıjesinde tuńǵysh Paralımpıada chempıony atandy. Bul jambyldyqtar úshin ǵana emes, búkil qazaq halqy úshin úlken jetistik boldy. Sondyqtan «Taraz-Arena» sport saraıynyń júzý basseınin Zúlfııa Gabıdýllınanyń esimimen ataý óte oryndy», deıdi ol.
Búginde elimizde Zúlfııa Gabıdýllınanyń izin basyp kele jatqan sportshylar barshylyq. О́z sózinde elimizdegi Paralımpıada quramasynyń bas bapkeri Sattar Beısembaev atyraýlyq Erjan Sálimgereev, pavlodarlyq Dmıtrıı Lı jáne astanalyq Sııazbek Dáleev sııaqty azamattardyń bolashaqta da Paralımpıada oıyndarynda top jaratynyna senimdi ekenin aıtty. Osy ýaqytqa deıin bul azamattar álem chempıonatyna qatysyp, eki dúrkin jeńimpaz atanǵan eken. Bolashaqta da bul azamattardyń Zúlfııa syndy jaryq juldyzdyń jolyn jalǵastyryp, qazaq halqynyń bedelin álemdik deńgeıge kóteretinine senim mol.
Jyl saıyn elimizdiń Paralımpıada boıynsha chempıonaty Qaraǵandy qalasyndaǵy Núrken Ábdirov atyndaǵy sport saraıynda ótip kelgeni belgili. Atalǵan sport keshenindegi júzý basseıniniń uzyndyǵy 25 metr. Al bıylǵy jylǵy el chempıonaty Taraz qalasynda uıymdastyrylady eken. Sebebi, elimizdiń ózge qalalaryna qaraǵanda «Taraz-Arena» sport saraıynyń júzý basseıniniń múmkindigi mol. Osy ýaqytqa deıin 50 metrlik júzý basseıninde júzdegen azamat sheberligin shyńdaǵan eken. Atap aıtsaq, memleket qamqorlyǵy esebinen Q.Sarymoldaev atyndaǵy balalar úıiniń 25 tárbıelenýshisi, kópbalaly otbasynan shyqqan mektep jasyndaǵy 710 oqýshy jáne birinshi, ekinshi toptaǵy, sonymen qatar bala kezden múmkindigi shekteýli 106 adam basseındi tegin paıdalanýda. Bolashaqta bul azamattardyń arasynan da Paralımpıada oıyndarynyń sheberleri men jeńimpazdarynyń shyǵatyny anyq.
«Taraz-Arena» sport kesheniniń búgingi tynys-tirshiligimen tanysý barysynda sol jerdegi jattyǵý zalynan qazaqstandyq qol kúres sheberi, úsh dúrkin álem chempıony, Qazaqstan Respýblıkasynyń eńbek sińirgen sport sheberi Dmıtrıı Trýbındi kezdestirdik. Trýbın óz sózinde «Taraz-Arena» sport saraıynda Zúlfııa Gabıdýllına sııaqty sport sheberimen birge jattyǵatynyn maqtan tutatynyn, sonymen qatar, osyndaǵy júzý basseınin onyń atyna berý kerektigin jetkizdi. Rasynda da, júzý basseınine jeńimpazdyń esimi berilse ıgi.
Bul kúnde Zúlfııa Gabıdýllınanyń esimi elge jaqsy tanys. Rıo tórinde qazaqtyń týyn kókke jelbiretken azamattyń jetistigine qýanbaǵan qazaq qalmady. Endigi jerde júzý basseınin budan bylaı Zúlfııa Gabıdýllına atymen atasaq, ońdy is bolar edi. Elimizdiń ár túkpirinen sport sańlaqtaryna arnalyp túrli keshender ashylyp jatqanda, Áýlıeata atyn álemge tanytqan janǵa júzý basseınin syılasaq, bul da bir eldiktiń kórinisi. Jambyl óńirinen shyǵyp, jahanǵa tanylǵan sportshynyń bul da bir mereıi bolar edi. Búginde talaı sport sańlaqtaryn shyńdap, sharshy topqa salǵan jáne nátıjesin kórip kele jatqan «Taraz-Arena» sport saraıy Jambyl oblystyq dene shynyqtyrý jáne sport basqarmasyna qaraıdy. Aldaǵy ýaqyttarda bul usynys Jambyl oblystyq ákimdigi jáne atalǵan basqarma tarapynan qoldaý tapsa, týǵan jer tulǵalaryna kórsetilgen taǵy bir laıyqty qurmet bolar edi degen oı bar.
Hamıt ESAMAN,
«Egemen Qazaqstan»
Jambyl oblysy