N.Pogodın atyndaǵy oblystyq orys drama teatry jasóspirimderdi akterlik sheberlikke baýlıtyn bolady.
Quramynda ónerge beıimi bar 40 bala bar teatr stýdııasy óz jumysyn bastap ketti. Jertóledegi eski daıyndyq zaly kúrdeli jóndeýden ótip, barlyq bólmeler jańartyldy. Sóz óneri men sahnadaǵy erkindikke orys drama teatrynyń aktrısasy Irına Pashkına úıretedi.
«Teatr sahnasynda júrgenime shırek ǵasyrǵa jýyq boldy. О́mirden túıgenim de, tájirıbem de mol. Sahna mádenıeti, qımyl-qozǵalys máneri, akterlik sheberlik, sheshendik óner jyldar boıy qalyptasady. Qazir 12 men 18 jas aralyǵyndaǵy jasóspirimder kelip júr», deıdi stýdııa jetekshisi.
Kolledjde muǵalim mamandyǵyna baýlynyp júrgen Mádın Bakına buryndary kópshilik aldynda sóıleýge qysylyp, ımense, endi ájeptáýir ysylyp qalǵany baıqalady. Onyń oıynsha, teatr stýdııasynda tálim-tárbıe alý bolashaq pedagog úshin artyqtyq etpeıdi. Al 11 jasar Dmıtrıı Prohorovtyń armany–akter bolý. Osy sebepti bolar, teatr stýdııasyna alǵashqylardyń qatarynda jazylypty. Alǵashqy áseri keremet.
N.Pogodın atyndaǵy oblystyq orys drama teatrynyń 130 jyldyq tarıhy bar. Munda sahnalanatyn qoıylymdar ónersúıer qaýymnyń úlken suranysyna ıe. Ata-analardyń teatr janynan balalarǵa arnalǵan úıirme ashý týraly tilegin qanaǵattandyrý maqsatymen mádenıet basqarmasy qarajat bólgen.
«Balalar jarty jyl boıy dáris alady. Sosyn qoıylym ázirleıdi Sońynan sertıfıkat tabys etiledi. Shyǵarmashylyq mamandyqtarǵa oqýǵa túskende kómegi tıeri sózsiz. Eń bastysy ózimiz úshin izbasarlar daıarlaýǵa yqpaly zor bolmaq», deıdi teatrdyń kórkemdik jetekshisi Elena Pokras.
О́mir ESQALI,
«Egemen Qazaqstan»
Soltústik Qazaqstan oblysy