EKSPO-2017 aýmaǵyndaǵy turǵyn úılerdi ótkizý 15 aqpannan bastap qaıta jalǵasady. Bul týraly «Báıterek development» AQ Ortalyq kommýnıkasııalar qyzmetiniń baspasóz ortalyǵynda habarlady.
«Turǵyn úılerdi ótkizý qaıta jalǵastyrylǵan kúnnen bastap satýdyń jańa mehanızmi qoldanylatyn bolady, ol turǵyn úıdi halyqqa jyldyq 3%-ben 12 jylǵa bólip tóleý arqyly ótkizýdi kózdeıdi. Jańa mehanızm boıynsha turǵyn úıdi satyp alý úshin satyp alýshy tólem qabilettiligin rastaýy jáne turǵyn úı qunynyń 20%-nan kem bolmaıtyn mólsherde bastapqy jarna salýy kerek», - dep málimdedi «Báıterek development» AQ Basqarma tóraǵasynyń orynbasary Asqarbek О́serbaev.
Aıta ketsek, turǵyn úılerdi ótkizýdiń tıimdi jańa mehanızminiń engizilýine baılanysty 2018 jylǵy 16 qańtardan bastap jyljymaıtyn múlikti satyp alýǵa ótinim qabyldaýdyń ýaqytsha toqtatylǵany týraly habarlanǵan edi.
Tólemdi bólip tóleý mehanızmi boıynsha tek 1 páter jáne 2-den aspaıtyn kólik turaǵynyń oryndaryn satyp alýǵa bolady. Satyp alý-satý sharty boıynsha tólemdi bólip tóleý merzimi ótinish berýshiniń 70 jasqa tolýymen shekteledi», - dep atap ótti.
Sonymen qatar, ótinish berý burynǵysha Digital Baiterek portaly arqyly júzege asyrylady. О́tinish berýshiniń jańa mehanızmdi tańdaýy úshin «tólem tásili» baǵanynda «bólip tóleý arqyly ótkizýdi» kórsetýi jáne qarjylaı múmkindigine qaraı bastapqy jarnasynyń mólsherin ózi belgileýi qajet. О́tinish berýshiniń tólem qabilettiligin esepteý «Qazaqstannyń turǵyn úı qurylys jınaq banki» AQ elektrondyq platformasy arqyly júzege asyrylady.
Aıta ketsek, satýǵa usynylatyn turǵyn úılerden 193 páter «7-20-25» baǵdarlamasynyń sharttaryna saı keledi.