Jańa tehnologııa qarapaıym shamdarǵa da kelip jetti. Burynǵy qoldanystaǵy qyzdyrý shamdaryn jaryq dıodty balamasy basyp ozdy. Uzaq qyzmet etedi, esesine shyǵyny az, elektr qýatyn únemdeıdi. Mundaı «aqyldy» shamdar kún sanap kórkeıip kele jatqan Atyraý kóshelerin tipti jarqyrata tústi. 2017 jyly 19 kóshege 1066 jaryq dıodty sham ornatylǵan edi, ótken jyly kóshe sany 20-ǵa jetti. Al 2019-2020 jyldary oblys ortalyǵynda 192 kóshe, Qulsary qalasynda 83 kóshe jańa tehnologııanyń ıgiligimen jaryqtandyrylady degen jospar bar.
Joba memlekettik-jekemenshik seriktestik aıasynda qolǵa alynyp otyr. Dástúrli memlekettik satyp alýlarmen salystyrǵanda memlekettik-jekemenshik seriktestik modelin qoldaný kezinde qurylys sapasy joǵary bolady, óıtkeni jobany ary qaraı paıdalanýǵa jeke seriktes jaýapty. Kóshe jaryqtandyrý qurylysy men paıdalaný isin elimizde alǵash qolǵa alǵan jeke kompanııa – «Batys Tranzıt» AQ. Mekemeniń atqarýshy dırektory Maqsat Isaqanov oblys ortalyǵy men qala mańyndaǵy eldimekenderdiń jáne Qulsary qalasynyń kóshelerindegi jaryq shamdaryn aýystyrý jumystary jalǵasyp jatqanyn aıtady. Jalpy uzyndyǵy 220 shaqyrym kóshege jańa shamdar ornatylady. Kompanııa jobaǵa 8 mlrd teńge kóleminde ınvestısııa tartýdy josparlaǵan.
Jasyratyny joq, buǵan deıin Atyraýdyń ortalyq kósheleri ǵana samaladaı jarqyrap turǵanymen, qala shetin, irgeles eldimekenderdi tún bolsa qoıý qarańǵylyq basatyn. Memlekettik-jekemenshik áriptestik aıasynda osy olqylyqtyń orny tolmaq. Bul jańalyqty qala turǵyndary da qýana quptap otyr. Kólik qozǵalysy men jaıaý júrginshilerdiń qaýipsizdigi úshin túngi jaryqtyń oryny bólek.
- О́tken jyly qalada elektr qýatynan 3 mln teńge únemdeldi, Led-shamdardyń osyndaı artyqshylyǵy bar, - deıdi oblystyq energetıka jáne turǵyn úı-kommýnaldyq sharýashylyq basqarmasy basshysynyń orynbasary Danııar Muqyshev. –Taǵy bir atap óter jaıt, shamdardy qýat kóziniń túsetin aýmaǵyna qaraı azaıtyp ne kóbeıtýge bolady. Shamdardy arnaıy qadaǵalaıtyn dıspetcherlik bólimshe ashyldy, sol arqyly elektrondy júıede shamdardyń jaǵdaılaryn anyqtaýǵa múmkindik bar. Jańa jobanyń merzimi on jyl.
Bolashaqta Atyraý-Inder, Atyraý-Dossor tas joldary da jaryqtandyrylady degen jospar bar. Memleket basshysynyń halyqqa Joldaýynda atap kórsetilgen «Aqyldy qala» tujyrymdamasyn júzege asyrý jolyndaǵy ıgiliktiń biri – osy.
Baqytgúl BABASh,
«Egemen Qazaqstan».
Atyraý