Astanadaǵy Elbasy kitaphanasy mýzeıiniń ǵımaratynda Irandaǵy ıslam revolıýsııasy jeńisiniń 40 jyldyǵyna arnalǵan «Iran kallıgrammasy» atty kórmeniń ashylý saltanaty ótti.
«Mádenıet arqyly únqatysý» halyqaralyq jobasy aıasynda Elbasy kitaphanasy Iran Islam Respýblıkasy elshiligimen birlese uıymdastyrǵan aıtýly sharanyń tusaýkeserine Iran Islam Respýblıkasynyń Qazaqstandaǵy elshisi Madjıd Samadzade Saber, kórme avtory Saıd Hýshmanesh jáne taǵy da basqa qurmetti qonaqtar men ónertanýshy mamandar qatysty.
– Kallıgramma óneriniń 30-40 jyldyq tarıhy bar. Irandyq naqqashı-hatty tarıhı jazbalar men qasıetti jerlerden, mórler men ydystardyń betinen keziktirýge bolady. Onyń negizin qalaǵan Pılaram, Mafı, Zenderýdı, Afdjeıı, Ehsaıı syndy tulǵalardyń jolyn búginde Saıd Hýshmanesh jalǵastyryp, kallıgramma óneriniń keń taralýyna úles qosyp otyr. Aıta keter mańyzdy jaıt, kallıgramma kórmesindegi sýretshi jumystarynan onyń osy óner tarıhynyń qyr-syryn meńgerip jazýdyń jáne onyń oqylýynyń qıyndyǵynan esh taısalmaǵandyǵyn, jańalyqtar engizý barysynda kóne dáýirlerge de tıesili elementterdi shynaıylyqpen sýretteı bilgendigin baıqaýǵa bolady, – dedi Elbasy kitaphanasy dırektorynyń orynbasary Kúláısha Aqtaeva kórmeniń saltanatty ashylý rásiminde.
Aıtýly kórmege ırandyq sýretshi Saıd Hýshmaneshtiń 40-qa jýyq jumysy qoıyldy. О́ziniń bar kásibı jáne shyǵarmashylyq ǵumyryn kallıgrafııa ónerine arnaǵan qylqalam ıesi elorda tórinde ótken búgingi jaýapty sátke 3 jyl boıy úzdiksiz ári tyńǵylyqty daıyndalypty. Bul jóninde Saıd Hýshmanesh bylaı dedi:
Kallıgrafııa óneriniń jańa aǵymyn qazaq halqyna kórsetýdi uıǵardyq. Jalpy, ózim kallıgrafııa ónerimen 27 jyldan beri aınalysyp júrmin. Onyń 7 jylyn oqýǵa arnasam, qalǵan 20 jyl boıy kallıgrafııa jáne grafıkalaý óneri boıynsha dáris oqyp kelemin. Osy jyldarda kallıgramma óneri boıynsha sýret salý tehnıkamdy jetildirdim. Alǵashqy kezde salynǵan týyndylarym men qazirgi jumystarym bir-birine múldem uqsamaıdy. Búgingi kórmedegi qazaqstandyq ónersúıer qaýym nazaryna usynylyp otyrǵan toptamaǵa tazhıbpen bezendirilgen ári ırandyq klassıkalyq jáne dástúrli kallıgrafııaǵa jatqyzylatyn «nastalık» jazýy qoldanylǵan birneshe týyndy, sondaı-aq zamanaýı ırandyq grafıka jáne kallıgrafııa qalybyna keltirilgen dástúrli nastalık, shekaste jazýlary qoldanylǵan birqatar týyndylar qoıyldy, dep sýretshi is-shara baǵdarlamasymen jan-jaqty tanystyryp ótti.
Atalǵan kórme Elbasy kitaphanasy mýzeıiniń ǵımaratynda 2019 jyldyń 10 aqpanyna deıin jalǵasady.
Nazerke JUMABAI,
«Egemen Qazaqstan»