Bıylǵy jyldyń mejeleri bekitildi

Ashylatyn zaýyttardyń qa­tar­ynda Qaraǵandy oblysyndaǵy quny 30,6 mlrd teńge bolatyn, fer­rosılısııa shyǵaratyn zaýyt, Aqtóbe oblysyndaǵy quny 6,9 mlrd teńgege teń, keramıka taq­ta­laryn óndiretin óndiris oshaq­tary bar. Mınıstrdiń aıtýynsha, «qara­paıym zattar ekonomıkasyn» da­mytý maqsatynda otandyq kásip­oryndardy qoljetimdi nesıe­lendirýge 600 mlrd teńge qaras­tyrylady. Onyń 400 mlrd teńgesi óńdeý ónerkásibine baǵyttalýǵa tıis. Sóıtip halyq tutynatyn otandyq ónimderdiń qatary 250-ge kóbeıedi. Onyń ishinde jeńil óner­kásipke jatatyn jıhaz óner­kásibi, sondaı-aq qurylys materıaldary bar. 

Bıylǵy jyldyń enshisine res­pýblıkalyq mańyzy bar 4,4 myń shaqyrym joldy qaıta jań­ǵyrtý jumystary da enip otyr. Onyń ishinde 518 shaqyrym jolǵa kúrdeli jóndeý júrgizilse, 1190 sha­qyrym avtojolǵa ortasha jón­deý jumystary júrgiziledi. 

Atalǵan mınıstrliktiń qu­zy­­retine kiretin mańyzdy sala­lar­dyń biri – halyqty turǵyn úımen qamtamasyz etý. Bıyl 13 mln sharshy metr turǵyn úı sa­lý jos­parlanyp otyr. Nátıje­sinde 118 myń otbasyna jańa baspana­nyń kilti tabys etilmek. Onyń ishinde 22 myń páter memleket qarjysy esebinen salynýǵa tıis.

Mınıstr J.Qasymbektiń aıtýynsha, bıyl Qazaqstan eksport­shylaryna Qytaı, Birikken Arab Ámirlikteri men Iran naryq­taryna shyǵý jeńildeıdi.

− Eksportqa baǵdarlanǵan kom­panııalarǵa Memleket basshy­synyń tapsyrmasyna sáıkes qar­jylyq qoldaýdan tys kómek sharalary kórsetiledi. Eks­porttaýshylarǵa qoldaýdyń servıstik sharalaryn kúsheıtý aıasynda QHR, BAÁ jáne Irannan ınspeksııalyq komıssııalardy qazaqstandyq eksporttaýshy kásiporyndarǵa shaqyrý arqyly olardyń naryqtaryna shyǵýdy jeńildetý kózdelgen, − dedi ol.

Mınıstr keltirgen derekter boıynsha, 2019-2021 jyldary eksporttaýshylardy qoldaý sharalaryn kúsheıtý úshin 500 mlrd teńge jumsalady. Qarjylyq já­ne servıstik sharalardy kúsheı­tý ákimshilik jáne saýda keder­gi­lerin eńserýge múmkindik beredi. Bızneske áleýetti satyp alý­shyny tańdaýǵa, kólik shyǵyn­daryn tómendetýge jol ashady. Belgilengen sharalardy ta­bysty júzege asyrǵan jaǵdaı­da shıkizattyq emes taýar ekspor­ty­nyń kólemin 2020 jylǵa qaraı 1,5 paıyzǵa, ıaǵnı 22,4 mlrd dollarǵa jetkizý josparlanyp otyr.

Mınıstrlikke qarasty ár salaǵa qatysty oqylǵan baıan­damalardan keıin Premer-Mı­nıstrdiń birinshi orynbasary As­qar Mamın Qazaqstannyń saýda saıasaty agressıvti bola túsýi tıis ekenin aıtty.

– Ishki jáne syrtqy saıasat sııaqty saýda saıasaty da birshama agressıvti ári proaktıvti bolýy qajet. Qazirdiń ózinde kúrdeli na­ryqtarmen básekege túsemiz. Taıaý jyldary kórshilerimizdiń qar­qyndy damýy esebinen qalyp­tasatyn erkin eksporttyq keńis­tiktegi ósim barynsha shekteýli bolady. Soǵan daıyn bolý qajet, − dedi birinshi vıse-premer. 

Alqa májilisi otyrysynda Indýstrııalandyrý, «Nurly jol» jáne «Nurly jer» memlekettik baǵdarlamalaryn iske asyrý, sondaı-aq shıkizattyq emes eksportty, tehnıkalyq retteýdi, geologııa jáne jer qoınaýyn paıdalanýdy, kólik jáne logıstıkany, azamattyq avıasııany, qurylys pen turǵyn úı-kommýnaldyq sharýashylyqty, ınnovasııa men ónerkásipti sıfrlandyrýdy ilgeriletý máseleleri qaraldy. 

P.S. Bet qattalyp jat­qan­da Elbasy Jarlyǵymen Úki­met otstavkaǵa ketip, Pre­mer-Mı­nıstr­diń mindetin ýaqyt­sha at­qarý Asqar Mamınge júkteldi.

Erkejan AITQAZY,

«Egemen Qazaqstan»