«Qazaqstan Eýropalyq Odaq - Ortalyq Azııa formatynda syndarly jáne senimdi dıalogty damytýǵa úlken mán beredi. Búgingi kúni Eýropalyq Odaq Ortalyq Azııa elderiniń gúldenýi men birligine múddeli jáne bizdiń senimdi seriktesimiz bolyp tabylady», - dep atap ótti Syrtqy ister mınıstriniń mindetin atqarýshysy Beıbit Atamqulov Eýropalyq Odaqtyń Ortalyq Azııa boıynsha Arnaıy ókili Peter Býrıanmen búgin ótken kezdesýinde.
EO Arnaıy ókiliniń Qazaqstanǵa sapary Eýroodaqtyń Ortalyq Azııa boıynsha jańa Strategııasynyń qabyldanýy qarsańynda qujattyń basym baǵyttaryn óńir elderimen aqyldasý maqsatynda ótýde. Sońǵy eki jyl boıy Qazaqstan aımaqtaǵy kórshiles eldermen birge qujatty daıyndaý sheńberinde sapaly ári mazmundy ıdeıalar men usynystar joldaǵan bolatyn.
P. Býrıan qazaqstandyq tarapqa jańa Strategııanyń mazmunyna qatysty konstrýktıvti usynystary úshin alǵysyn bildirdi jáne onyń tıimdi iske asyrylýy barlyq múddeli taraptarǵa tıesili ekendigin atap aıtty.
Kezdesý barysynda adamı kapıtaldy damytý, quqyq ústemdigin jáne sapaly memlekettik basqarýdy qamtamasyz etý, shaǵyn jáne orta bıznesti damytý, jalpy sıfrlandyrý, kóliktik-logıstıkalyq ınfraqurylymdy damytý, energııa tıimdiligin arttyrý, jasyl tehnologııalar, qorshaǵan ortany qorǵaý, sý resýrstaryn tıimdi paıdalaný jáne qaýipsizdik sııaqty baǵyttardyń jańa Strategııada qamtylý mańyzdylyǵy atap ótildi.
Mınıstrdiń mindetin atqarýshy bolashaq Strategııany ımplementasııalaý tetigine basty nazar aýdara otyryp, damý jobalaryn tıimdi iske asyrýdy jáne resýrstardy tıimdi paıdalanýdy qamtamasyz etýge baǵyttalǵan birqatar naqty usynystardy jetkizdi. OA elderin damytýǵa járdemdesýge baǵyttalǵan Eýroodaqtyń aıtarlyqtaı aımaqtyq jobalyq qyzmetti júzege asyratynyn eskere otyryp, jańa Strategııa sheńberinde aımaqtaǵy EO jobalyq qyzmetiniń aýqymyn saqtaý qajettiligi týraly aıtyldy.
Yntymaqtastyqtyń perspektıvalyq baǵyttarynyń biri retinde aǵymdaǵy jyly EO qarajaty esebinen Qazaqstannyń joǵary oqý oryndarynda Aýǵanstan qyzdaryn oqytýdyń birlesken baǵdarlamasyn iske qosylýy atap ótildi. Taraptar bilim berý jobasynyń Aýǵanstandaǵy áıelder men balalardyń jaǵdaıyn jaqsartýǵa, sondaı-aq jalpy osy eldegi jaǵdaıdy retteýge yqpal etetinine kelisti.
Aımaqtyq yntymaqtastyq máselelerin talqylaı kele, taraptar Ortalyq Azııadaǵy sońǵy jyldary joǵary dınamıkamen erekshelenip kele jatqan saıası jáne ekonomıkalyq prosesterdi atap ótti. Bul óz kezeginde ózara tıimdi seriktestiktiń barlyq spektri boıynsha jańa perspektıvalar ashatyn bolady.
QR-EO ekijaqty yntymaqtastyq máselelerin talqylaý aıasynda, Arnaıy ókil P. Býrıan Qazaqstannyń saýda-ekonomıkalyq yntymaqtastyqty tereńdetý, qazaqstandyq eksportty ulǵaıtý, ekonomıkanyń basym sektorlaryna eýropalyq ınvestısııalardy tartý, bizdiń azamattarymyz úshin EO vızalyq rejımin jeńildetý maqsatynda dıalogty damytý nıeti týraly habardar etti.
Taraptar Qazaqstan Respýblıkasy men Eýropalyq Odaq arasyndaǵy Keńeıtilgen áriptestik jáne yntymaqtastyq týraly Kelisimniń (KÁYK) kúshine ený perspektıvalaryn talqylady jáne onyń ózara múddeli kóptegen salalarda ekijaqty yntymaqtastyqqa jańa múmkindikter ashady.
Sonymen katar, Mınıstrdiń mindetin atqarýshy suhbattasyn QR syrtqy saıasatynyń ekonomıkalyq quramdas bóligin kúsheıtý jónindegi syrtqy saıası vedomstvonyń jańa mindetterimen tanystyrdy. Atap aıtqanda, Qazaqstan eýropalyq vektorynda, eń aldymen, saýda-ekonomıkalyq jáne ınvestısııalyq yntymaqtastyqty tereńdetýge baǵyttalǵany týraly atap ótildi.
2018 jyly taýar aınalymy 37,7 mlrd AQSh dollaryn qurady, 2018 jyldyń birinshi jartysynda Qazaqstannyń ekonomıkasyna tartylǵan tikeleı sheteldik ınvestısııalardyń jalpy kólemi 12,3 mlrd dollarǵa jetti. Búgingi tańda Qazaqstanda eýropalyq kompanııalardyń qatysýymen shamamen 3 mlrd AQSh dollary kóleminde 24 ınvestısııalyq joba júzege asyrylýda. EO Qazaqstannyń saýda seriktesteri arasynda bizdiń taýar aınalymynyń jalpy kóleminde shamamen 50% úlespen kóshbasshylyqty saqtap otyr. Osy kólemdi saqtap qana qoımaı, olardy ulǵaıtý baǵytynda jumys isteý qajettiligi atap ótildi.
Kezdesý sońynda taraptar aǵymdaǵy jyly óte mazmundy bolatyn EO-OA jelisi boıynsha aldaǵy is-sharalar kestesin talqylady.
Jalpy alǵanda, kelissózder Qazaqstan men Eýropalyq Odaq arasyndaǵy qalyptasqan strategııalyq qatynastar deńgeıine tán senimdi jáne dástúrli dostyq atmosferasynda ótkizildi.
P. Býrıan saparynyń baǵdarlamasyna sáıkes Parlament Senaty men Májilistiń tıisti komıtetteriniń basshylyǵymen kezdesýler kózdelgen.