Búginde startap akademııasy degen uǵym tildik qorymyz ben qoldanysymyzǵa áldeqashan enip ketken. Joǵary oqý ornynda stýdentterge bıznes júrgizýimen kásipkerlik daǵdylardy úıretetin bastapqy mektepti jańashyl bastama deýge bolady. Ony belgili bir joǵary oqý orny kólemimen shektemeı, qaıta óńirlik jáne respýblıkalyq deńgeıge deıin kóterip, startap-jobalardy naqty iske asyratyp alań retinde qoldanǵan durys.
Osy oraıda óńirdegi startap akademııa Q.Jubanov atyndaǵy Aqtóbe óńirlik memlekettik ýnıversıtetiniń rektory Baýyrjan Erdenbekovtiń bastamasymen ashylǵanyn aıta ketken jón. Munda tigin sehy, bıologııalyq zerthana, músin jasaý sheberhanasy jáne aspazdyq bólmeler jabdyqtalǵan. Qazirgi kezde startap akademııa ózderi oılastyrǵan jobalarǵa sáıkes óńirdegi brend taýarlar túrin kóbeıtip, ony tıimdi paıdalaný joldaryn belgiledi.
Sonyń biri – tary. «Bizdiń qazirgi maqsatymyz osy strategııalyq daqyldan jasalatyn ónim túrlerin kóbeıtý. Bul ózdiginen paıda bolatyn is emes. Sondyqtan startap-alańynan osy jobany iske asyrýǵa ıkemi bar bolashaq kásipkerlerdi ázirleýdi, olarǵa bıznestiń qyr-syryn tanystyrýdy kózdep otyrmyz», deıdi joba ıesi, ýnıversıtet rektory B.Erdenbekov. Onyń aıtýynsha, startap akademııada ıdeıalar men jobalar bir-birimen toǵysyp jatýy tıis. «Bul baǵytta biz kem degende stýdentterimizdiń elý paıyzyn osy alańnan tájirıbe jınaqtaıtyndaı is-sharalar keshenine belgiledik. Qazirgi istiń barysy jaqsy ári oń nátıjege qol jetkize alatynymyzdy kórsetedi», deıdi rektor. Aqtóbede startap akademııanyń ashylýy bıylǵy Jastar jylymen tuspa-tus kelip otyrǵany da istiń ómirsheńdigin tanytady. Bir sózben aıtqanda, startap jobalar kásipkerlikti damytýdyń negizi dese de bolady. Q.Jubanov atyndaǵy Aqtóbe óńirlik memlekettik ýnıversıteti bul ilkimdi isti jalań bastamaǵanyn da aıtýǵa tıispiz. Mysaly, aıtýly joǵary oqý orny 2017 jyldyń aıaǵynda «Startap-2017» baıqaýyn ótkizip, bolashaqta bastalatyn istiń aldymen álippesin ashqan. Alǵashqy baıqaý tek sóz júzinde qalmaı, naqty istiń atqarylýyna septigin tıgizgeni búgingi oń qadamdarǵa bastama bolǵan.
Osy baıqaýda bas báıgeni ıelengen «Aqyldy balabaqsha» jobasy búginde «Zerek» atty balalardy damytý ortalyǵyna aınalǵan. Ári muny ýnıversıtet ujymynyń áleýmettik baǵyttaǵy startaptardy damytý isindegi tuńǵysh tabysy dep te baǵalaǵan oryndy. О́tken 2018 jyly da ýnıversıtette startap akademııany ashý úshin jan-jaqty uıymdastyrý jumystary júrgizilgen. Sonyń náıjesinde jastardy áleýmettik paıdaly jumystarǵa tartý jóninde laıyqty qadamdar jasalǵan. Osy jyly respýblıkada ótkizilgen «Jas prodjekt» baıqaýyna atalǵan oqý ornynan 11 ótinim berilip, onyń ishinde 6 startap grant ıegeri atanǵanyn atap aıtýǵa bolady. Sondaı-aq atalǵan ýnıversıtet stýdentteri jeti mıllıon teńgeni utyp alǵany respýblıkadaǵy óńirlik joǵary oqý oryndary arasyndaǵy joǵary kórsetkish.
Ýnıversıtettegi startap-jobalar Aqtóbe oblystyq kásipkerlik basqarmasymen birlesken túrde júzege asyrylyp keledi. Mundaı jumystar oqý ornynyń óńirdegi ıntellektýaldy resýrstardy shoǵyrlandyrý ortalyǵyna aınalýyna múmkindik beredi.
Temir QUSAIYN,
«Egemen Qazaqstan»
AQTО́BE