TMD Parlamentaralyq Assambleıasynyń baıqaýshylar toby Kıshınevte 24 aqpanda ótetin Moldova Respýblıkasynyń Parlamentin saılaý jónindegi jumystarǵa kiristi. Bul týraly Senattyń baspasóz qyzmeti habarlady.
Qazaqstan Respýblıkasy Parlamenti Senaty Tóraǵasynyń orynbasary, top úılestirýshisi Bektas Beknazarov jáne TMD PAA Bas hatshysy isterin ýaqytsha atqarýshy, TMD PAA Keńesi hatshylyǵynyń jetekshisi Dmıtrıı Kobıskıı uıymdastyrý otyrysyn ótkizdi jáne qysqa merzimdi monıtorıng kezindegi toptyń mindetteri men halyqaralyq baıqaýshylar óz qyzmetinde ustanatyn negizgi qaǵıdalar aıtyldy.
Demokratııa men parlamentarızmdi damytý jáne TMD PAA-ǵa qatysýshy memleketterde azamattardyń saılaý quqyqtarynyń saqtalýyna monıtorıng júrgizý halyqaralyq ınstıtýtynyń saraptama tobynyń basshysy Dmıtrıı Baryshnıkov uzaq merzimdi monıtorıng júrgizýdiń nátıjeleri, sondaı-aq osy ınstıtýttyń sarapshylary daıyndaǵan taldaý jáne anyqtamalyq qujattar men onyń qorytyndylary týraly áńgimeledi.
Instıtýt dırektory Dmıtrıı Gladeı top múshelerin aldaǵy kezeńge arnalǵan jumys josparymen, onyń ishinde baıqaýshylardyń qalaýy boıynsha ázirlenetin daýys beretin kúngi baǵdarlarmen tanystyrdy. Demokratııa men parlamentarızmdi damytý jáne TMD PAA-ǵa qatysýshy memleketterde azamattardyń saılaý quqyqtarynyń saqtalýyna monıtorıng júrgizý halyqaralyq ınstıtýtynyń qyzmetkerlerinen quralǵan baıqaýshylar Moldova Respýblıkasynyń Ortalyq saılaý komıssııasy kandıdattar men tirkelgen halyqaralyq baıqaýshylar mıssııasyna arnap uıymdastyrǵan kezdesýge qatysty.
Júzdesýde buqaralyq aqparat quraldarynyń ókilderi de boldy. Kezdesýge qatysýshylar saılaýdyń ashyqtyǵyn qamtamasyz etý máselelerin talqylady jáne saılaý aldy naýqanynyń barysynda quqyq buzýshylyqtardy joıý qajettigi men ulttyq jáne halyqaralyq baıqaýshylar jumysynyń tıimdiligin arttyrýdyń mańyzdylyǵyn atap ótti. Aıtylǵan aqparat top jumysynyń nátıjeleri boıynsha qujattardy ázirleý kezinde paıdalanylatyn bolady.