Almaty oblysynda jeti júzden astam bala jasóspirimder isi jónindegi polısııanyń esebine alynǵan. Al jyl basynan beri kámeletke tolmaǵandarǵa qatysty 20 qylmystyq is tirkelgen eken.
Oblystyq ıývenaldy polısııanyń basshysy, polısııa maıory Dáýlet Smaqovtyń aıtýynsha, balalar arasyndaǵy quqyq buzý derekteri negizinen qolaısyz otbasynan shyqqan jasósipirimderge tán bolyp otyr. Qazir arnaıy polısııa aımaqtaǵy 800 otbasynyń bala tárbıesine kóńil bólme ıtin, ishkilik pen nashaqorlyqqa áýes nemese basqa da jat qylyqtarǵa jaqyn ekenin anyqtap, esepke alypty.
- Bizdiń polıseıler jasóspirimder tárbıesine qatysty semınar, keńesterdi jıi ótkizedi. Bul balalardy jat ádetten saqtandyrýǵa kómektesedi. Ádette bilim basqarmasymen birge ótkizilgen is-sharaǵa densaýlyq saqtaý jáne bilim berý salasynyń, ata-analar komıtetiniń, sondaı-aq memlekettik emes uıymdardyń ókilderin qatystyramyz, - deıdi polısııa maıory Dáýlet Smaqov.
Aıtpaqshy, jyl basynan beri oblys aýmaǵynda oıyn klýbtary men kompıýter ortalyqtarynan shyqpaıtyn balalardyń da qatary ósipti. Tipti, túngi kóńil kóterý oryndaryna da jıi bas suǵatyn jasóspirimder bar eken. Polıseıler «Profılaktıka» jedel aldyn alý is-sharasy barysynda osyndaı 155 balany anyqtapty.
Qalmahanbet MUQAMETQALI,
«Egemen Qazaqstan»
Almaty oblysy