Búgin qala ákimi Baqyt Sultanovtyń tóraǵalyǵymen Astana ákimdigi apparatynyń kezekti otyrysy ótti. Onda qala ákimdigin transformasııalaýdyń ekinshi kezeńi talqylandy, dep habarlaıdy Astana qalasy ákimdiginiń resmı saıty.
«Keshe ótken Májilis Parlamentiniń plenarlyq otyrysynda Elbasy búgingi áleýmettik-ekonomıkalyq jaǵdaı men syrtqy saıası ahýaldy eskere otyryp, birqatar basty baǵyttardy aıqyndap berdi. Onyń ishinde Elbasy, halyqtyń jaǵdaıyn kóterip, azamattardy áleýmettik qoldaý men ıdeologııalyq jumysty kúsheıtý jónindegi birqatar tapsyrma berdi. Bul qala ákimdiginiń qurylymyn ózgertip, keshendi jumys jasaýdy talap etti. Osyǵan oraı, Astana ákimdigin transformasııalaýdyń ekinshi kezeńin jarııalaýdyń kezi kelip otyr», – dedi B. Sultanov.
Onyń aıtýynsha, transformasııalaýdyń birinshi kezeńi ekonomıkalyq tıimdilikti, memlekettik apparat jumysynyń sapasy men jedeldigin arttyrýǵa óz septigin tıgizdi. 2018 jyly transformasııalaý men jańa tásildemelerdi engizýdiń arqasynda Astana ákimdigi 27, 6 mlrd teńgeni únemdedi. Ekinshi kezeńde birqatar ózgeris oryn alady dep kútilýde.
Birinshiden, qazirgi qarjy, bıýdjettik jáne strategııalyq josparlaý basqarmalary jańa ekonomıka basqarmasy bolyp biriktirilip, qalamyzdyń strategııalyq damýy men basym sektorlardy damytý arqyly jańa ekonomıkany jasaqtaýǵa jaýap beretin bolady.
Ekinshiden, Qalalyq ortany renovasııalaý basqarmasy qurylady. Oǵan qurylys jáne turǵyn úı saıasaty, qalalyq ortany regenerasııalaý, qorshaǵan ortany qorǵaý jáne tabıǵatty paıdalaný basqarmalary kiredi.
«Bul salada da óte mańyzdy mindetter tur. Jobalyq-baǵdar ádisin qoldaný arqyly áleýmettik nysandar men turǵyn úı qoryn salý, jobalyq basqarýdyń áleýetin paıdalana otyryp, ákimdiktiń tapsyrys berýshi retindegi rólin nyǵaıtý, barlyq múddeli taraptarmen tıimdi qarym-qatynas ornatý, smart-jobalardy iske asyrý qajet», – dedi qala ákimi.
Ol, sonymen qatar, keshendi jáne júıeli sheshimder arqyly bıýdjet qarajatyn tıimdi paıdalanýdy arttyrý kerektigin aıtty.
«Tabıǵatty paıdalaný salasynda qalany jasyldandyrý jumystaryn jańasha júrgizgen jón. Qalanyń landshaftyq dızaınyna baılanysty zamanaýı tendensııalardy eskere otyryp, jańa erejeler jasaýdy tapsyramyn. Ekologııalyq qaýipsizdik salasynda uzaq merzimdi basymdyqtar negizinde álemdik tájirıbege súıene otyryp, jobalyq basqarý ádisterin engizý jáne qorshaǵan ortany qorǵaý tujyrymdamasyn daıyndaý qajet», – dedi B. Sultanov.
Úshinshiden, barlyq qoǵamdyq-ıdeologııalyq jumys qoǵamdyq damý basqarmasy arqyly uıymdastyrylady. Bul basqarmaǵa qoǵamdyq damý isteri, mádenıet jáne sport, tilderdi damytý jáne arxıv isi basqarmalary biriktiriledi.
«Úsh organnyń bir ıdeologııalyq blokqa enýi ekonomıkalyq tıimdilikpen qatar, ákimdiktiń atalǵan saladaǵy jumysyn jańa sapalyq deńgeıge shyǵarady. Bul ıdeologııalyq jumystar elordalyqtardyń mádenı deńgeıin kóterý jáne salaýatty ómir saltyn qalyptastyrý arqyly astanalyqtardyń sanasyn tıisinshe jańǵyrtýǵa múmkindik bereri sózsiz», – dedi ákim.
Osyǵan baılanysty Baqyt Sultanov óziniń orynbasary Nurlan Nurkenovqa ákimdiktiń ıdeologııalyq jáne áleýmettik jumystaryn jańǵyrtýdy, áleýmettik saladaǵy jumystardy jaqsartý arqyly jergilikti atqarýshy organdardyń oń ımıdjin qalyptastyrý baǵytynda jumys isteýdi júktedi. Odan bólek, ákimdikte jańadan sıfrlandyrý jáne memlekettik qyzmet basqarmasy qurylady.
«Elbasynyń elimizdi álemniń eń ozyq otyz memleketiniń qataryna qosýǵa qatysty naqty tapsyrmasy bar ekenin jaqsy bilesizder. Bul tıisinshe jańa ınnovasııalyq damý men jedel texnologııalyq ózgeristerdi talap etedi. Elordada aýqymdy «Smart Astana» jobasy iske asyrylýda. Qazir tujyrymdama bekitilgen. Bul, birinshiden, xalyqtyń jaǵdaıyn jaqsartýdy, qolaıly qyzmetterdi usynýdy kózdeıtin zamanaýı joba. Atalǵan salalardy sıfrlandyrý eń áýeli eńbek ónimdiligin arttyrýǵa, qarapaıym xalyqqa jáne kásipkerlerge sapaly qyzmet kórsetýdi qamtamasyz etýge, jyldam ári qaýipsiz aqparat usynýǵa, derekterdi jınaqtaý, óńdeý, adam kapıtalyn damytý, ıaǵnı kreatıvti qoǵam qalyptastyrýǵa múmkindik beredi», – dep atap ótti B.Sultanov.
Osyǵan oraı, ákim barlyq orynbasarlaryna memlekettik organdardyń qyzmetin jan-jaqty zerdelep, ony jaqsartýǵa qatysty naqty usynystar engizýdi tapsyrdy.