Astanada Táýelsizdik saraıynda Elbasynyń qatysýymen «Nur Otan» partııasynyń kezekti XVIII sezi bastaldy.
Bas partııanyń 20 jyldyǵyna oraı uıymdastyrylǵan jıynda partııalyq organdardyń esebi tyńdalyp, «Nur Otan» partııasynyń 2030 jylǵa deıingi jańa baǵdarlamasy talqylanady. Sonymen qatar, saıası uıymnyń jarǵysyna ózgertýler men tolyqtyrýlar engizilip, partııa Saıası keńesiniń quramy jańartylady.
«Atalǵan sezdiń partııamyzdyń 20 jyldyǵy aıasyndaǵy basty is-shara bolaryna jáne aldaǵy jyldardaǵy maqsat-mindetterdi anyqtap, bizdiń saıası uıymnyń odan ári jańǵyrýyna tyń serpin beretinine senimimiz mol» dep jazdy partııa Tóraǵasynyń birinshi orynbasary Máýlen Áshimbaev óziniń áleýmettik jelidegi paraqshasynda.
Aıta keteıik, keshe Astanada «Nur Otan» partııasynyń kezekti XVIII seziniń qarsańynda aımaqtardan jınalǵan partııa múshelerine arnalǵan taqyryptyq sessııalar ótti. Qazirgi ýaqytta elimizdiń eń iri saıası uıymynyń barlyq óńirlerde 1 mln-nan astam azamattyń basyn qosatyn 247 fılıaly jáne 5600 bastaýysh partııa uıymdary jumys isteıdi.