2018 jyly shaǵyn jáne orta bıznes sýbektileriniń sany artyp, eseptik kezeńde 108 prosent ósimdi quraǵan. Kásipkerlikti keshendi qoldaý maqsatynda Elbasy «Bıznestiń jol kartasy» baǵdarlamasyn 2025 jylǵa deıin jalǵastyrýdy tapsyrdy.
– Baǵdarlamanyń barlyq salalary boıynsha aqmolalyq kásipkerlerge 7 mıllıard teńge qarjylaı kómek kórsetildi. Sonyń ishinde, tek ótken jylda kásipkerlik sýbektilerin qoldaýǵa 2 mıllıard teńge qarjy jumyldyryldy. Elbasy Joldaýynda baǵdarlamanyń uzartylatyny aıtylǵan bolatyn. Tıisinshe, kásipkerlerge qarjylyq qoldaý kólemi de artady,-deıdi oblystyq «Damý» kásipkerlikti qoldaý qorynyń dırektory Rýslan Ahmetov.
26 jyl ustazdyq qyzmet atqarǵan Elena Býgaenko búginde tabysty jeke kásipker. Ol óz isin bastaýǵa bel býyp, «Damý» qoryna júginedi. Osy qordyń naqty kómeginiń arqasynda oıǵa alǵan isi ońynan oralypty. Demek, qoldaýdy aıqyn sezinip otyr.
– Alǵash kásip bastaǵanymda ǵımarat, qarjy tapshylyǵyn sezindim. Buǵan deıin Nazarbaev zııatkerlik mektebinde qyzmet istep edim. «Damý» qorynyń mamandarymen birlesip, jobamdy júzege asyrdym,-deıdi «Býratıno» mektepke deıingi bilim berý ortalyǵynyń jetekshisi Elena Býgaenko.
Búginde ortalyqtyń jańa ǵımaratqa kóshý qajettiligi týyndap otyr. Kásipker bul joly da «Damý» qorymen birlesip qyzmet atqarýǵa nıetti. О́z isin keńeıtýdi oıǵa alǵan kásipkerlerdiń biri – Konstantın Lýgovıskıı. Tis dárigeri bıznestegi alǵashqy qadamdaryn tolǵanyspen eske alady. Ol ótpeli kezeńde «Bıznestiń jol kartasy» baǵdarlamasy arqyly kósegesin kógertken.
–Bıznesimdi alǵashqyda kishkentaı kabınetten bastadym. Keıin kásibimdi keńeıtý kerek boldy. Alaıda, qajetti qarjym joq edi. «Damý» qory bankke kepil usynyp, «Bıznestiń jol kartasy 2020» baǵdarlamasy arqyly nesıe aldym,–deıdi tis dárigeri Konstantın Lýgovıskıı.
«Bıznestiń jol kartasy» baǵdarlamasy Elena Býgaenko men Konstantın Lýgovıskıı tárizdi myńdaǵan azamattarǵa jol kórsetti. Demek, baǵdarlama óziniń tıimdiligin dáleldep otyr.
Baıqal BAIÁDIL,
«Egemen Qazaqstan»
Aqmola oblysy