Ulystyń uly kúni – Naýryz meıramy óńirdiń barlyq aımaǵynda joǵary deńgeıde atalyp ótti deýge bolady. О́skemenniń irgesindegi ózge ult ókilderi kóp qonystanǵan Glýbokoe aýdany da ulyq merekege erekshe ázirlenipti.
Qazaq úshin 7 sany qaı kezde de qasıetti sanalǵan ǵoı. Glýbokoe aýdany da bıyl 7 sanyna jete kóńil bólip, merekelik sharalardy Elbasynyń «Uly dalanyń jeti qyry» maqalasymen baılanystyrypty. Aýdan ortalyǵyna arnaıy tigilgen 7 kıiz úıge «Atqa miný mádenıeti», «Uly daladaǵy ejelgi metallýrgııa», «Ań stıli», «Altyn adam», «Túrki áleminiń besigi», «Uly Jibek joly», «Qazaqstan – alma men qyzǵaldaqtyń otany» degen ataý berilip, 7 atqa mingen jigit sherýdi bastap shyǵypty. Otyzdan astam etnos ókilderi mekendeıtin aýdan turǵyndary 7 kıiz úıdi aralap, qazaq halqynyń salt-dástúrlerimen tanysyp, ulttyq taǵamdardan dám tatyp, altybaqan teýip, atqa minip, sporttyq saıystarǵa qatysypty. «Naýryz 5 myń jyldyq tarıhy bar jer júzindegi eń kóne meıramdardyń biri. Shyǵys halyqtary Naýryz merekesin qalaı qarsy alsań, jyl solaı ótedi dep yrymdaıdy. Kóktem merekesi ár shańyraqqa shattyq, yrys-yntymaq ákelsin. Bıylǵy jyl Naýryz dastarhanyndaı yrysty, berekeli jyl bolsyn», - dep lebizin jetkizdi aýdan ákimi Qalıqan Baıǵonysov.
Alańdaǵy 7 kıiz úıde «Qorjyn ashý», «Besikke bóleý», «Quıryq baýyr asatý», «Betashar», «Qazan jarys», «Tilashar», «Qudalyq» sekildi ádet-ǵuryptarymyz da kelýshiler nazaryna usynylypty.
Azamat QASYM,
«Egemen Qazaqstan»
Shyǵys Qazaqstan oblysy,
Glýbokoe aýdany