Saltanatty sharada quttyqtaý sóz sóılegen mınıstr kórme-jármeńke «Kórme» ortalyǵynda 24 jáne 27 sáýir aralyǵynda jumys isteıtinin, atalmysh shara bıyl tórtinshi ret uıymdastyrylyp otyrǵanyn, Eurasian Book Fair 2019 kórme-jármeńkesine 13 eldiń 90 kompanııasy qatysyp jatqanyn jetkizdi. Olardyń arasynda Reseı, Ázirbaıjan, Armenııa, Tájikstan, Qyrǵyzstan, О́zbekstan, Túrkııa, Qytaı, Iran, Polsha, Belgııa, Latvııa, Ýkraına elderi bar.
Sondaı-aq «Folıant», «Almaty Kitap», «Atamura», «Mektep», «Qazaq ensıklopedııasy» sııaqty Qazaqstannyń jetekshi baspalary, «Mann, Ivanov ı Ferber», «Belyı gorod», «Rozovyı jıraf», «KompasGıd», «Samokat» sııaqty Reseıdiń ataqty baspalary qatysýshylardyń qatarynda.
– Halyqaralyq kitap kórme-jármeńkesin ótkizýdiń basty maqsaty – kitapty nasıhattaý, qatysýshylardyń ádebı murasyn damytý, oqyrman mádenıetin qalyptastyrý, – dedi Mádenıet jáne sport mınıstri Arystanbek Muhamedıuly.
Uıymdastyrýshylardyń aıtýyna qaraǵanda kórme aıasynda tusaýkeserler, ádebı ekskýrsııalar, poezııalyq baǵdarlar, avtorlarmen, baspagerlermen, sýretshilermen, polıgrafıstermen ótetin kezdesýler syndy 150-den astam is-shara bar. Sonymen qatar shara aıasynda kitaptardy baspa baǵasy boıynsha satyp alý múmkindigi qarastyrylǵan. Balalar úshin sheberlik sabaqtary, konkýrstar, ertegiler jelisi boıynsha uıymdastyrylatyn ınteraktıvti kvester, anımatorlardyń qatysýymen ótetin oıyn-saýyq baǵdarlamalar ótedi.
Kórme-jármeńkeniń alǵashqy kúni L.N.Gýmılev atyndaǵy Eýrazııa ulttyq ýnıversıtetiniń rektory, QR UǴA akademıgi Erlan Báttashuly Sydyqovtyń «Shákárim» atty kitabynyń tusaýeser rásimi boldy. Sharany akademık Dıhan Qamzabekuly júrgizip otyrdy. Jıynda akademık-ǵalymdar Jabaıhan Ábdildın, Bolat Kómekov, eltańba avtory Jandarbek Málibekov, pýblısıst-dramatýrg Sultan Orazalın, jazýshy Turlybek Mámeseıitov, professor Rahymjan Turysbek sóz sóılep, avtordyń «Shákárim» eńbegine qatysty oı-pikirlerin bildirdi.
О́z kezeginde sóz alǵan Erlan Báttashuly Sydyqov san tilge aýdarylǵan eńbektiń arǵy-bergi tarıhyna toqtala kelip, jaǵymdy jańalyq – súıinshi habardy jarııa etti: Aǵymdaǵy jyly akademık Erlan Sydyqovtyń «Qunanbaı» atty kitaby Reseı elinen «JZL» serııasy boıynsha jaryq kórmekshi. «Súıinshi habar» dep otyrǵanymyz osy!
Tusaýkeser rásimge qatysýshylar L.N.Gýmılev atyndaǵy Eýrazııa ulttyq ýnıversıteti ǵalymdarynyń eńbekteri qoıylǵan kórmeni aralap, estelik sýretke tústi.