Búginde 300 myńnan asa múshesi bar «Aýyl» halyqtyq-demokratııalyq patrıottyq partııasynyń sezinde kún tártibindegi 2019 jyldyń 9 maýsymynda ótetin Qazaqstan Respýblıkasy Prezıdentiniń kezekten tys saılaýyna partııa atynan kandıdat usyný máselesi qaraldy. Jıyndy ashqan «Aýyl» partııasynyń tóraǵasy Álı Bektaev aldaǵy mańyzdy saılaýǵa laıyqty úmitkerdi tańdaýda talqylaý, pikirtalastar bolǵanyn aıta kelip, barlyq partııalastary Tóleýtaı Raqymbekovke senim artatynyn aıtty. Budan keıin partııa tóraǵasy úmitkerdiń qysqasha ómirbaıanymen tanystyrdy.
Sezd barysynda T.Raqymbekov delegattar suraqtaryna jaýap berdi. «Aýyl» partııasynyń saılaýdaǵy múmkindigin qalaı baǵalaısyz?» degen alǵashqy saýalǵa ol: «Partııamyzdyń múmkindigi óte joǵary dep esepteımin. Elimizdegi jalpy halyqtyń 43 paıyzy aýylda turady. Onyń ústine qaladaǵy turǵyndardyń ózi nemese ata-anasy aýyldan shyqqan», deı kele, qazaqstandyqtardyń basym bóligi aýyl máselesine janashyr bolatynyn alǵa tartty. Suraq-jaýap kezinde ol saılaýaldy baǵdarlamasynyń negizgi baǵyty qandaı bolatynyn túsindire kelip, «Aýyldardyń, kóp balaly otbasylardyń, aýyl sharýashylyǵynyń máseleleri maǵan jaqsy tanys. Sonymen birge qaladaǵy turǵyn úı-kommýnaldyq sharýashylyq, jol, kásiporyndar, óndiris, ǵylym taqyrybynda da tájirıbem jeterlik», dep túsindirdi.
Birneshe saýaldarǵa jaýap bergen soń delegattardyń pikiri tyńdaldy. Jaryssózde birinshi bolyp sóz alǵan partııanyń Jambyl oblystyq fılıalynyń tóraǵasy Erbolat Baıuzaquly aýyldy gúldendiretin – jastar ekenin aıtyp, elimizdegi shalǵaı aımaqtarǵa jastardy turaqtandyrý máselesin bir jolǵa qoıatyn, aýyldy jan-jaqty damytatyn keshendi baǵdarlama ázirleýdi usyndy. Al Almaty qalalyq fılıalynyń tóraǵasy Abdýlla Saparuly: «Búgingi úmitker týraly partııanyń usynysyn óte oryndy dep aıta alamyn. Sebebi Tóleýtaı Sataıulyn burynnan bilemiz, birlesip jumys istedik. Ol – bilim, ǵylym jáne óndiristi úılestire alatyn azamat», dep qoldaý men senim bildirdi.
Delegattar daýys berip, biraýyzdan usynysty qabyldaǵannan keıin qaıta minbege kóterilgen T.Raqymbekov: «Meniń kandıdatýramdy usynǵandaryńyz úshin alǵys bildirgim keledi. Men úshin bul – joǵary mártebe ári úlken jaýapkershilik», dedi. Sonymen qatar ol partııanyń saıası ustanymy, partııalastarynyń usynys-pikirleri saılaýaldy baǵdarlamasyna negiz bolatynyn tilge tıek etti.
Sezd sońynda sóz alǵan Á.Bektaev jıynǵa qatysýshylar men delegattar úshin arnaıy qoıylǵan kórmedegi fotosýretterge toqtaldy. «Bul eńbekter – partııanyń «Egemen Qazaqstan» gazetimen birlesip uıymdastyrylǵan «Aýyl naqyshtary» atty fotosýretshiler baıqaýyna kelip túsken 100-den asa jumystyń jartysyna jýyǵy ǵana. Qadirli qonaqtardyń aldynda osy baıqaýdyń jeńimpazdaryn marapattaýǵa ruqsat etińizder!», dedi partııa tóraǵasy. Bul baıqaý osydan bir jyl buryn jarııalanyp, jarysqa qatysýshylardyń jumystaryn jyl boıyna belgili fotograftar qarap, qorytyndysy bıylǵy naýryzdyń sońynda belgili boldy. Ádil qazylardyń quramynda Shúkir Shahaı (qazylar alqasynyń tóraǵasy), Sovetbek Maǵzumov, Erlan Omar, Aıdarbek Ǵazız syndy kásibı mamandar bar. Fotobaıqaýdyń qorytyndysy boıynsha III oryndy Jeńis Ysqabaı, II oryndy Igor Býrgandınov, al I oryndy foto ónerine eleýli eńbek sińirgen, fotograftardyń aqsaqaly Bolat Omarálıev jeńip aldy. Jeńimpazdarǵa dıplom men aqshalaı syılyq tabys etildi.