EQDB men Jasyl Klımat Qory Qazaqstanda kún elektr stansııasyn qarjylandyrýǵa 16.7 mıllıon AQSh dollaryn berdi. Atalmysh kelisimge Beıjińde ótken «Bir beldeý – bir jol» bastamasynyń ekinshi halyqaralyq forýmy barysynda qol qoıyldy, dep habarlaıdy EQDB baspasóz qyzmeti.
EQDB Jasyl Klımat Qorymen (JKQ) áriptestikte Shyǵys Qazaqstan oblysyndaǵy Jalǵyztóbe kentinde qýattylyǵy 30 MVt jańa kún elektr stansııasynyń qurylysy úshin 16,7 mln AQSh dollary mólsherinde qaryz usynyp, Qazaqstanda energııanyń jańartylatyn kózderin damytýdy qoldaýyn jalǵastyrýda.
Búgin EQDB 40 sheteldik kóshbasshy, sonymen qatar 100-den asa el men halyqaralyq uıymdardyń myńdaǵan ókilderi qatysqan Beıjińdegi «Bir beldeý – bir jol» bastamasynyń ekinshi halyqaralyq forýmy kezinde qytaılyq «Universal Energy» kompanııasymen qarjylandyrý týraly kelisimge qol qoıdy.
Nesıelik kelisimge EQDB turaqty ınfraqurylym tobynyń basqarýshy dırektory Nandıta Parshad pen «Universal Energy» kompanııasynyń prezıdenti jáne bas dırektory Nan Iı qol qoıdy.
EQDB uıymdastyrǵan qarjylandyrý toptamasyna 4,4 mlrd teńge somasyna (11,7 mln AQSh dollary) jergilikti valıýtadaǵy nesıe jáne 5 mln. AQSh dollaryna deıingi somada JKQ nesıesi kiredi. Alynǵan qarajat Shyǵys Qazaqstan oblysyndaǵy Jalǵyztóbe kentinde ornalasatyn qýattylyǵy 30 MVt jańa kún elektr stansııasynyń qurylysyn qarjylandyrýǵa paıdalanylatyn bolady. Stansııa jylyna 38,900 MVt elektr energııasyn shyǵaryp, kómirqyshqyl gaz tastandylaryn jylyna 31,650 tonnaǵa qysqartýǵa kómektesedi.
Joba qurylysyn «Universal Energy» – jasyl energetıka salasyndaǵy jobalardy ınvestısııalaý, ázirleý, qurylysyn salý, paıdalaný jáne qyzmet kórsetýge mamandandyrylǵan kompanııa júzege asyrady. «Universal Energy» búkil álemde, sonyń ishinde Qazaqstanda kún jobalary portfelin belsendi damytyp keledi.
Jalpy alǵanda, bul joba Orta Azııada jańartylatyn energetıka oblysyndaǵy jobalardy qarjylandyrý úshin 200 mln. eýro jalpy somasyna negizdik kelisimge sáıkes qol qoıylǵan segizinshi joba bolyp tabylady.
Jýyrda ǵana Qaraǵandy oblysynda qýattylyǵy 40 MVt jańa kún elektr stansııasy iske qosyldy. Bul jobany da EQDB JKQ-men birlesip qarjylandyrdy.
Tek 2018 jyldyń ózinde ǵana jasyl ekonomıkaǵa kóshý jónindegi tásildeme sheńberinde EQDB jasyl ekonomıka jobalaryna jalpy somasy 3,4 mlrd eýro ınvestısııa jumyldyrdy.
Qazirgi tańda EQDB 254 joba aıasynda Qazaqstan ekonomıkasyna 8.85 mıllıard eýrodan asa qarjy ınvestısııalady.
ALMATY