Osydan úsh jyl buryn qoǵamdyq qor taǵy bir ıgi isti qolǵa alyp, jazýshy Marhabat Baıǵuttyń uıytqy bolýymen «Taýpisteli taǵylymy» jobasynyń tusaýyn kesken bolatyn. «Túrki tildes, túgel bol» taqyrybynda ótken konferensııa da kópshiliktiń esinde. Kórkem ádebıetti nasıhattaýda, jelkildep ósip kele jatqan jas jetkinshekterdi bilimdi hám ultjandy etip tárbıeleýge zor septigin tıgizgen «Taýpisteli taǵylymyn» árbir 3 jyl saıyn dástúrli túrde ótkizý týraly kelisilgen edi. Mine osy joba aıasynda Túlkibas aýdany, Pisteli aýylynda ótken «Taýpisteli taǵylymynyń» bıylǵy is-sharasy «Sherhan men Nasyr baýynda» dep ataldy.
«Rýhanı jańǵyrý: bolashaqqa baǵdar» baǵdarlamasy aıasynda Túlkibas aýdany ákimdigi men «Marhabat-Mıras» qoǵamdyq qorynyń uıytqy bolýymen, halyqaralyq «Alash» syılyǵynyń ıegeri, jazýshy Marhabat Baıǵuttyń ıdeıasymen ótken bul kezdesýge onyń bir top áriptesteri sonaý Nur-Sultan, Almaty, Tarazdan ǵana emes, kórshi О́zbekstannan da arnaıy keldi. Kók masaty kilem ústinde qonys tepken Pisteli jurty qonaqtardy zor qurmetpen qarsy aldy. Olar jazýshy Marhabat aǵanyń shańyraǵynda baldaı tátti qymyzdan iship, Sherhan men Nasyr baýynyń tarıhyna qandy. Bul baýǵa shırek ǵasyrdan astam ýaqyt buryn zańǵar jazýshy Nasyr Fazyl men Sherhan Murtaza tal otyrǵyzypty. Qos tulǵanyń ekken taldary qut bolyp daryp, baý jaıqalyp ósken. Jyldan-jylǵa aýmaǵy keńeıip, jemisimen qýantqan. Qyp-qyzyl bolyp ýyljyp pisken almadan tistegender onyń dámin kópke deıin umytpaǵan. Nasyr Fazyldyń 90 jyldyǵyna jáne Sherhan Murtazanyń rýhyna arnalǵan jıynda urpaqtar sabaqtastyǵy ornap, aǵa býyn ómirden kórgen-bilgenderin, túıgen oılaryn jas býyn ókilderimen bólisti. Jastar arnaý óleńderin oqydy.
Basqosýda oblys ákiminiń orynbasary Málik Otarbaev maqamy bólek jazýshy Marhabat Baıǵuttyń týǵan jerine alystan at arytyp kelgen qonaqtarǵa, ádebıetke janashyr jastarǵa alǵysyn aıtty. Sondaı-aq, jıyn barysynda aýdan rýhanııatynyń kemeldenýine eleýli úles qosyp júrgen isker ákim Nurbol Turashbekov «Marhabat-Mıras» qorynyń uıytqy bolýymen ótip jatqan árbir joba, árbir jıyn oıy oramdy, sózi ótkir talaı qalamgerdiń, jas býynnyń qanatyn keń jaıýyna septigin tıgizip kele jatqanyn atap ótti. «Kemeńger jazýshy Sherhan Murtaza «Túlkibasy – tulparlar týǵan jer, suńqarlar qonǵan jer» dep sýrettegen Túlkibas jeri – qazaqtyń maqtanyshyna aınalǵan kóptegen tulǵalar týyp-ósken qasıetti meken. Osyndaı kıeli mekende qanat qaǵyp, bilim qýyp, jazýshylyq pen jýrnalıstıkany qatar alyp júrgen azamattyń biri Marhabat Baıǵut! Onyń shyǵarmalary qazaq ádebıetiniń damýyna súbeli úles qosyp, mazmuny tereń, taǵylymy mol bolǵandyqtan qalyń oqyrmannyń júregine jol taýyp, rýhyn shyńdap, ádebıet súıer qaýymnyń kózaıymyna aınalǵan. Aǵamyzdyń muryndyq bolýynyń arqasynda qurylǵan «Marhabat-Mıras» qory qanshama talantty jastardy qoldaý maqsatynda túrli jobalardy júzege asyrdy. Sonyń biri – «Taýpisteli taǵylymy». Minekeı, búgingi basqosýdyń maqsaty – halyq arasynda kórkem ádebıetti nasıhattaý, bolashaq jastardy patrıottyq rýhta tárbıeleý, olardy kitap álemine shaqyrý arqyly oı-óristerin keńeıtý, damytý, daryndy jastardyń shyǵarmashylyǵyna qoldaý kórsetý bolyp tabylady», - dep, jınalǵan qaýymǵa shyǵarmashylyq tabys tiledi. Al Nesipbek Dáýtaıuly, Narmahan Begaly, Esenǵalı Raýshanov syndy qarymdy qalamgerler jastarǵa tálim men tárbıesi mol ápsanalar aıtyp, sana-sezimderine sáýle júgirtti. Basqosý sońynda olar jastarǵa jolashar bata berip, aq jol tiledi.