D.Abaevtyń aıtýynsha, «2018 jyly BAQ týraly zań jobasyna 200-deı ózgeris engizildi. Onyń ishinde birqatary kásibı ortada pikirtalas týǵyzdy. Sondyqtan jobadan BAQ jumysyn toqtatqan jaǵdaıdaǵy tırajyn tárkileý týraly baptar alynyp tastaldy. Sondaı-aq memlekettik arnalardan kommersııalyq jarnamalardy kórsetýge de shekteý qoıyldy.
Atalǵan mınıstrliktiń telekommýnıkasııa komıteti tóraǵasynyń orynbasary Mıhaıl Komıssarov zań jobasyn talqylaý barysynda medıaqaýymdastyqtan túsken pikirler men usynystar qaperge alynǵanyn, tolyq nusqasy daıyn bolǵanda taǵy bir talqylaýǵa usynylatynyn tilge tıek etti. Áńgime aýany azamattyq telearna qurý taqyrybyna oıysqan kezde Medıaalıans uıymynyń jetekshisi Armanjan Baıtasov odan saıası astar izdeýdiń qajeti joqtyǵyn aıtty. Tipti «mınıstrmen baılanys joq» degen ókpe-naz da ótkenniń enshisinde qaldy. Qazir áleýmettik jelilerde iri laýazym ıeleriniń barlyǵy akkaýnttaryn ashyp jatyr. Jýrnalıst qana emes, áleýmettik jeli qoldanýshy qarapaıym azamattyń bılik ókilderine aryz-shaǵymyn aıtýǵa aıtýǵa múmkindikteri bar. Eger ózi bılik ókilderi áleýmettik jelilerdi baspasóz hatshysy arqyly emes, tikeleı ózderi júrgizse, bul másele sheshiledi.
«Aǵylshynnyń BBC telearnasynyń qazaqstandyq balamasyn qurý úshin bizge qansha qarjy kerek?» degen suraq jıi qoıylady. BBC korporasııasynyń qarjylandyrý kózi telehabarlardy taratý týraly lısenzııasynan túsedi. Basqasha aıtqanda, onyń jazylýshylary arna jańalyqtaryn kórý úshin jylyna 140-180 eýro tóleıdi. Qazaqstandyqtardyń bárinde ondaı múmkindik joq» degen A.Baıtasovtyń pikirine mınıstr qosylatynyn bildirdi.
Sondyqtan qoǵamdyq telearna máselesi qoǵam úshin sonshalyqty mańyzdy emes. «Youtube bar, ınternet bar. «Dojd» telearnasynyń qojaıyny Natalıa Sındeevany jaqsy bilemin. Onyń 70 myń kórermen-jazylýshysy bar. Ol solardyń qarjysymen arnanyń jumysyn júrgizip otyr», dedi ol.
Al «Informbıýro» medıaportalynyń bas redaktory Mıhaıl Dorofeev BAQ ókilderi áleýmettik jelilerdiń qyspaǵynda qalǵanyn jetkizdi. Kóńil aýdarýǵa tıisti faktor – jelide jarııalanǵan feık-aqparattardan soń keıbir quzyrly oryndar BAQ ókilderi men basshylaryn «bir búrip alýdy» ádetke aınaldyrǵanǵa uqsaıdy. Bul jerde kináli jýrnalıst emes, áleýmettik jelini qoldanýshylar. «Sol sebepti keıbir quzyrly oryndar jazalaý týraly áreketke kirispesten buryn ózderi jaıly aqparat taratýshynyń kim ekenin anyqtap alǵany mańyzdy», deıdi M.Dorofeev.
Sondaı-aq kásibı medıaqaýymdastyqtar týraly másele sheshimin tappaı keledi. BAQ-tyń basyn biriktirip, múddesin qorǵaıtyn, ottan da, sýdan da alyp shyǵatyn qýatty táýelsiz qurylym joq. Barlary birjaqty baǵyt ustanady. «PR- ındýstrııadaǵy básekelestikke ekiniń biri tótep bere almaıdy. Biraq olar máselelerin sheshý úshin qaýymdastyq quryp alady. Medıa Alıans osy máseleni alǵa jyljytady dep úmittenemin», dedi M.Dorofeev.
Munan keıingi áńgime mınıstrlikterdiń baspasóz hatshylaryna qaraı oıysty. 31 arna bas dırektory Nurjan Jalaýqyzy sheneýnikterdiń jýrnalıstermen sóılesýge yqylas tanyta bermeıtini qalypty jaǵdaıǵa aınalǵanyn jetkizdi. Tipti keıbir kezde quzyrly oryndardan aqparat alý fýtbol alańyna kóbirek uqsaıdy. Bul rette Aqparat komıtetiniń Qoǵammen jáne memlekettik organdarmen baılanysty úılestirý basqarmasynyń basshysy Baqnııaz Qarashına BAQ pen bılik arasyndaǵy mundaı áńgimelerdiń aýyrtpalyǵy baspasóz hatshylaryna tıetinin aıtty. «Baspasóz hatshylarynyń ókilettiligi týraly másele talaı ret kóterildi. Eger bul jaǵdaı rettelse, baspasóz hatshylaryna mınıstrge tikeleı shyǵý múmkindigi berilse, biraz máseleniń kúrmeýi tarqatylady», deıdi B.Qarashına. «Jaýaptan jaltarý abyroı ápermeıdi. Jýrnalıske sypaıy ǵana oqıǵanyń sebep-saldary tekserilip jatqanyn, qorytyndy shyqqan kezde mindetti túrde habarlaıtynyn aıtýǵa bolady. Eki taraptyń túsinistikpen jumys isteýine bárimiz múddeli bolýymyz kerek», dep atap ótti – Atameken Business Channel» medıaholdınginiń bas dırektory Qanat Saharııanov. ALMATY