Eske salsaq, bıyl qańtar aıynda oblystaǵy Saran qalasynda qýaty 100 MVt bolatyn, Ortalyq Azııadaǵy eń iri kún elektr stansasy iske qosylǵan bolatyn. Al bul KES, mamandardyń aıtýynsha, 40 myńnan astam turǵyny bar Saran sııaqty 10 qalany elektr qýatymen qamtamasyz ete alady.
Endi mine, oblysta ekinshi kún elektr stansasy salynyp, paıdalanýǵa berildi. Jańa nysan Balqash qalasynan 60 shaqyrymdaı jerdegi Gúlshat eldi mekeniniń janynan boı kóterdi. Jańa stansanyń bir jylǵa jeter-jetpes ýaqyt ishinde salynyp bitkenin aıtý kerek. Qurylys jumystaryna 300-ge jýyq adam jumyldyrylǵan. Nysan oryn tepken 104 gektar aýmaqqa 120 myńnan astam kún paneli ornalastyryldy. Mamandardyń esebine súıensek, qýaty 40 MVt bolatyn kún elektr stansasy 70 myńnan astam turǵyny bar Balqash sııaqty bes qalany elektr energııasymen tolyqtaı qamtamasyz ete alady eken.
Aıta keterlik jaıt, Gúlshat kún elektr stansasy tolyqtaı shetel ınvestorlarynyń qarajatyna salyndy. Qurylys jumystaryna jáne qajetti qural-jabdyqtar alýǵa 46 mıllıon AQSh dollary kóleminde qarjy jumsalǵan. Búginde Gúlshat KES-inde 20 adam jumyspen qamtylǵan.
Jyl saıyn 58 mln kV/saǵ-tan astam elektr energııasyn óndiretin jańa nysandy iske qosý saltanatyna oblys ákimi Erlan Qoshanov pen Energetıka vıse-mınıstri Suńǵat Esimhanov jáne Eýropalyq qaıta qurý jáne damý bankiniń ókilderi, qazaqstandyq kún energetıkasy qaýymdastyǵynyń ókilderi, ardagerler, Balqash qalasynyń qurmetti azamattary, «Jasyl ekonomıka» baıqaýynyń jeńimpazdary qatysty.
Elimizdiń Tuńǵysh Prezıdenti N.Nazarbaev Qazaqstandaǵy energetıka salasynda balamaly energııanyń úlesin 30 paıyzǵa jetkizý týraly tapsyrma bergen bolatyn. Gúlshatta boı kóterip, iske qosylǵan kún elektr stansasy osy mejeni baǵyndyrýǵa bet alǵan batyl qadam. Budan bólek, Qaraǵandy oblysyndaǵy Shet aýdanynda salynyp jatqan taǵy bir kún elektr stansasy maýsym aıynda iske qosylýy kerek. Bul degenińiz, Qaraǵandy óńiriniń balamaly elektr energııasyn óndirý isinde tasy órge domalap-aq tur degen sóz.
Qaraǵandy oblysy