Búgingi tańda Qazaqstannyń barlyq elektr stansııalarynyń jalpy qýaty 21 GVt-qa teń. «Qazaqstandyq kún energetıkasy qaýymdastyǵy» ZTB dırektorlar keńesiniń tóraǵasy Nurlan Qapenov osylaı dedi.
– 2018 jyldyń qorytyndysy boıynsha álemdik kún energetıkasynyń belgilengen qýaty 500 GVt-dan asty. 2018 jyldyń ishinde 100 GVt-tan astam qýat óndiretin fotoelektrlik stansalar salyndy, - dedi ol.
N.Qapenovtiń aıtýynsha, ǵalamsharda elektr energııasyn óndirý úshin kún energııasyn paıdalanatyn 90 el bar. 32 elde 1 GVt-tan astam qýat óndiretin stansalar ornatylǵan. Kúnnen energııa óndiretin nysandardyń qýatyn 300-den 500 GVt-ke kóbeıtýge 2-aq jyl ýaqyt ketipti. Salystyrý úshin aıtar bolsaq, AES-terdiń qýaty shamamen 400 GVt-ty quraıdy. Bedeldi álemdik sarapshylar 2019 jyly búkil álemde 129 GVt fotoelektrlik kún elektr stansalary salynady degen boljam jasap otyr.
Byltyr elimizde óndirilgen «jasyl» energııanyń kólemi 1,35 mlrd kVt-qa jetip, elektr energııasynyń jalpy kólemindegi úles salmaǵy 1,27 %-dy quraǵan bolatyn. Aldaǵy ýaqytta bul kórsetkish qarqyndy túrde ósýge tıis.
– Jalpy somasy 100 mlrd teńgeni quraıtyn kelisimder men memorandýmdarǵa qol qoıý arqyly Jańǵyrmaly energııa kózderi sektoryna ınvestısııalar tartý boıynsha jumystar júrgizildi. Nátıjesinde, búgingi tańda jańǵyrmaly energetıka sektorynda jyl basynan beri 7 jańa nysan salyndy. Búgingi tańda respýblıka aýmaǵynda jalpy qýaty 678,6 MVt bolatyn 74 JEK nysany bar, - dedi Energetıka mınıstrligi Jańǵyrmaly energııa kózderi departamentiniń dırektory Aınur Sospanova.
Onyń aıtýynsha, 2018 jyly Jańǵyrmaly energııa kózderi jobalary úshin alǵashqy halyqaralyq aýksıondyq saýda-sattyqtyń uıymdastyrylyp, oǵan jergilikti jáne halyqaralyq qatysýshylar tarapynan úlken qyzyǵýshylyq baıqalǵan.
«Qazaqstandyq kún energetıkasy qaýymdastyǵy» ZTB basqarma tóraǵasy Kalııa Hısamıdınova 4-5 shildede Býrabaı kýrort aımaǵynda energetıka salasynyń barlyq múddeli qatysýshylarynyń basyn qosatyn «Solar Fest Qazaqstan» iskerlik festıvali ótetini týraly habarlady.
Qazaqstan jańǵyrmaly energııa kózderin energetıkalyq keshendi damytý vektorlarynyń biri retinde qarystyratynyn aıta keteıik. 2017 jyly elordada ótken EKSPO kórmesinde ol basty basty taqyryby retinde kóterilgeni belgili. JEK sektoryn damytý josparyna sáıkes, óndiriletin elektr energııasyndaǵy onyń úlesi 2020 jyly – 3 %-ǵa, 2025 jyly - 6%-ǵa, 2030 jyly - 10%-ǵa jetip, 2050 jyly barlyq tutynylatyn energııa kózderiniń jıyntyq energııa tutynýdyń jartysyn qamtýǵa tıis.