Búginde 255 eldi mekenge ortalyqtandyrylǵan sý qubyrlary tartylmaǵan. Iаǵnı, aýyldyqtardyń besten biri áli sapaly aýyz sýǵa zárý. Ákimdiktiń otyrysynda esep bergen energetıka jáne TÚKSh basqarmasynyń basshysy Ádilbek Áýbákirov 2011-2018 jyldar aralyǵynda 1,9 myń shaqyrym qubyr tartylyp, 56 eldi meken qamtylǵanyn baıandady. Bıyl bul salaǵa 9,1 mıllıard teńge bólinip,32 eldi mekenge sý qubyry tartylady.
Alaıda, qarajat qomaqty bolǵanymen, ıgerilýi kóńil kónshitpeıtinin aımaq basshysy Qumar Aqsaqalov atap kórsetti. Qajetti jobalyq-smetalyq qujattar baıaý ázirlenedi, saraptamalar ýaqytyly júrgizilmeıdi. 5 aýdan ǵana jobalyq-smetalyq qujattardy usynǵan.
«Kórsetkish kóńil kónshitpeıdi. Jumys qarqyny tómen. Aýdan ákimderi joǵary jaýapkershilik tanytýy tıis. Sondaı-aq qoldanystaǵy sý taratý nysandaryn senimdi basqarýǵa berý jaıy da tıisti deńgeıde atqarylmaı keledi. 175 nysannyń tek 92-si ǵana kásipkerlerdiń qaramaǵyna berilgen», dedi Qumar Irgebaıuly.
Jıynda «Qyzyljar sý» jáne «Petropavl jylý jelileri» seriktestikteriniń jaýapsyzdyǵy da atap kórsetildi. Bul kásiporyndar jańadan asfalt tóselgen jerlerdi qaıta qazyp, qubyrlardy almastyrýdy tıisti oryndarmen kelispesten atqaratyn kórinedi. Qazǵan jerlerdi qalypqa keltirmeý de ádetke aınalyp ketken.
Q. Aqsaqalov osyndaı olqylyqtar qaıtalanatyn bolsa, monopolısterdi jazalap, aıyppul salý kerektigin qatań eskertti.
Soltústik Qazaqstan oblysy