Páter kiltterin oblys ákimi Bolat Baqaýov tabystady. Páter alǵan soǵys ardageri Ákimbek Ábdiraıymov 95 jasta. Atamyz maıdanǵa 1942 jyly shaqyrylyp, 60-shy avtomatshylar polkynyń 204-shi atqyshtar dıvızııasynyń quramynda Belorýssııanyń Vıtebsk jáne Smolensk oblystarynyń aýmaǵyndaǵy shaıqastarǵa qatysyp, Ýkraınany azat etýge qatysqan eken.
Urys dalasyndaǵy birneshe jaraqattardan keıin múgedektik alǵan Ákimbek Ábdiraıymov erligi men batyrlyǵy úshin ekinshi dárejeli «Otan» jáne «Qyzyl juldyz» ordenderimen marapattaldy. Soǵys ardageri Qapsalıamov Qudaıbergen maıdanǵa 17 jasynda attanǵan. Atamyz 34-shi tankige qarsy atqyshtar dıvızıonynda artılerıst-kózdeýshi retinde shaıqastarǵa qatysty.
Qart maıdanger úshinshi dárejeli Dańq ordenimen, «Varshavany azat etkeni úshin», «Erlik isteri úshin» medalderimen, mereıtoılyq medaldermen marapatalady. 1950 jyly áskerden qaıtqan Qudaıbergen Qapsalıamov týǵan aýylyna oralyp, ishki ister organdarynda qyzmet etti. El tynyshtyǵyn qorǵaýdaǵy eńbegi úshin ol «Minsiz qyzmeti úshin» medalimen jáne «Mılısııa úzdigi» tós belgisimen marapattaldy.
Al, Vıacheslav Chernyshev ásker qataryna 1944 jyly shaqyrylyp, 76-shy gvardııalyq atqyshtar dıvızııasynda soǵysty. 1945 jyldyń qańtarynda jeńil jaraqat alǵan ol 1953 jyly zapasqa shyǵyp, oqytýshylyq qyzmetpen aınalysty.
Vıacheslav Chernyshev ekinshi dárejeli Otan ordenimen, «Germanııany jeńgeni úshin», «Berlındi alǵany úshin» medalderimen jáne mereıtoılyq nagradalarmen marapattalǵan.
– Vıacheslav Vladımırovıch ómiri páter suraǵan emes, maǵan da tyıym saldy. Búgin páter alǵanymyz biz úshin tosyn syı boldy, – deıdi ardagerdiń zaıyby Tatıana Chernysheva.
Iá, ómirde namysyn bárinen joǵary qoıatyn, Otany úshin ot keshkenin paryzym dep júreginde saqtaıtyn, qurbandarǵa máńgi bas ıietin osyndaı jigerli minezdi atalardyń bar ekeni qýantady.