9 mamyr merekesi Taldyqorǵan qalasynyń Ortalyq mádenıet jáne demalys saıabaǵyndaǵy «Dańq» obelıskisine gúl shoqtaryn qoıý rásiminen bastaldy. Sharaǵa oblys ákimi Amandyq Batalov bastaǵan áskerıler, ardagerler men qala jurtshylyǵy Máńgilik alaý aldynda taǵzym etti.
Munan keıin qoldaryna maıdangerlerdiń sýretterin ustaǵan 1 myńǵa jýyq adam «Máńgilik polk» sherýine shyǵyp, qalanyń ortalyq kósheleri arqyly «Jastar» saıabaǵyna deıin júrip ótti. Al «Jastar» saıabaǵyna qurylǵan dala sahnasynda «Urpaqqa uran bolǵan – Uly Jeńis!» atty merekege arnalǵan teatrlyq kórinis qoıyldy. Kóriniste Otan týraly ánder aıtylyp, maıdan dalasyndaǵy áskerı ómir beınelendi.
Jetisýdaǵy Jeńis kúnin toılaý «Taldyqorǵan» ıppodromyndaǵy at sporty jarystaryna ulasyp, keshkisin merekelik otshashýmen aıaqtaldy.