Shekaralyq aımaqtardyń polısııa vedomostvolarynyń jetekshileri,ózge de quqyq qorǵaý organdarynyń ókilderi qatysqan keńeste esirtki quraldary jáne psıhobelsendi zattardyń zańsyz aınalymyna qatysty qylmystardy ashý, kólik quraldaryna qylmystyq qolsuǵýshylyqqa jáne kontrafaktilik alkogol ónimderiniń aınalymyna qarsy birlesip-qımyl jasaý máseleleri boıynsha sheshimder qabyldandy.
SQO PD bastyǵy, polısııa polkovnıgi Marat Tólebaev óz sózinde halyqaralyq ózara is-qımyl jasaý formatynyń tıimdiligin atap ótti. Esirtki qylmysyna qarsy is-qımyl basqarmasynyń bastyǵy, polısııa polkovnıgi Jandos Basybaevtyń aıtýynsha, sıntetıkalyq esirtki zattary qoǵamda erekshe alańdaýshylyq týdyryp otyr. 2017 jyly Petropavl qalasy aýmaǵynda sıntetıkalyq psıhobelsendi zattardy jarnamalaý jáne taratýmen aınalysatyn 9 ınternet resýrsy anyqtalǵan. Byltyr onyń sany 108-ge, bıyl 79-ǵa jetken. Esirtki zattary kontrabandasynyń 15 faktisi tirkelgen. Olardyń úshten biri sheteldikterge tıesili.
Qylmystyń atalǵan túrlerine qarsy is-qımyldy barynsha shıratý qajettiligin reseılik áriptester biraýyzdan qoldady. Reseıde de osyǵan uqsas jaǵdaılar jıi oryn alyp turady. Esirtki quqyq buzýshylyq jasaǵany úshin Qazaqstannyń úsh azamaty ustalypty.
Sondaı-aq, avtokólikterdi aıdap áketýge tosqaýyl qoıý jáne osy maqsatta kúsh biriktirý keleli taqyryptardyń birine aınaldy. 1,5 jyldyń ishinde Qyzyljar óńirinde qylmysqa qatysty 30 avtokólik tárkilengen. Halyqaralyq onlaın-alańdaǵy suhbatqa ózek bolǵan taǵy bir másele – alkogol ónimderiniń, onyń ishinde kontrafaktilik ónimderdiń zańsyz aınalymyna qarsy is-qımyldar júrgizý. Qos taraptyń aıtýynsha, qylmystardyń basym bóligi masań kúıde jasalady. Sondyqtan bul másele quqyqtyq tártipti qamtamasyz etýde óte mańyzdy ról atqarady. Bıyl teriskeıde alkogol ónimderiniń 119 quqyq buzýshylyǵy áshkerelengen. Zańsyz aınalymnan 475 lıtr ishimdik alynǵan. Alkogol ónimderin satýmen shuǵyldanatyn 28 kásipkerdiń lısenzııasy keri qaıtarylǵan. Kórshi el ókilderi quramynda spırti bar « sýsyndardy» zańsyz óndirýge jáne Qazaqstannan kontrafaktilik alkogol ónimderin jasyryn túrde jetkizýge tosqaýyl qoıý tájirıbelerimen bólisti.
Kez kelgen qylmysqa qarsy baǵyttalǵan keshendi is-sharalar óz jemisin bermeı qoımaıdy. Shekaralas óńirler úshin mundaı birlesken baǵdarlamalardyń mańyzy zor. Quqyqtyq tártipti qamtamasyz etýdiń ishki, syrtqy múmkindikteri mol, desti beınekonferensııaǵa qatysýshylar.
Soltústik Qazaqstan oblysy